ကနေဒါအစိုးရဟာ အစိုးရထုတ်ပေးထားတဲ့ မိုဘိုင်းဖုန်းတွေမှာ  တရုတ်ပိုင် ဆိုရှယ်မီဒီယာအက်ပ် TikTok တွေ အသုံးပြုတာကို ဖေဖော်ဝါရီ ၂၇ ရက်မှာ ပိတ်ပင်လိုက်ပါတယ်။

TikTok ဟာ privacy နဲ့ လုံခြုံရေးအတွက် “လက်မခံနိုင်တဲ့အဆင့်ကို ရောက်သွားပြီ” လို့လည်း ပြောပါတယ်။

ကနေဒါအစိုးရဟာ နောင်အနာဂတ်မှာ ပြည်ထောင်စုအဆင့် အစိုးရဝန်ထမ်းတွေက TikTok ကို ဒေါင်းလုဒ်မဆွဲကြဖို့တားမြစ်ရေး စီစဉ်နေတယ်လို့ ကနေဒါဘဏ္ဍာရေးဘုတ်အဖွဲ့ အတွင်းရေးမှူးရုံးရဲ့ ထုတ်ပြန်ချက်ထဲမှာ ဖော်ပြထားပါတယ်။

TikTok ရဲ့ ဒေတာစုဆောင်းတဲ့ နည်းလမ်းတွေဟာ ဖုန်းရဲ့ အကြောင်းအရာတွေကို သိသိသာသာ ဝင်ရောက်ခွင့် ပေးထားတယ်လို့ ထုတ်ပြန်ချက်ထဲမှာ ဖော်ပြထားပါတယ်။

ကနေဒါဝန်ကြီးချုပ် ဂျပ်စတင် ထရူး‌ဒေါက ဒီဆုံးဖြတ်ချက်ဟာ ကနေဒါက တခြားလူတွေကိုလည်း သူတို့ရဲ့ ကိုယ်ပိုင်ဒေတာ လုံခြုံရေးကို ပြန်သုံးသပ်ဖို့ တွန်းအားပေးနိုင်တယ်လို့ ပြောပါတယ်။

ကနေဒါရဲ့ ဆုံးဖြတ်ချက်ကြောင့် စိတ်ပျက်မိတယ်လို့ TikTok က ပြောပါတယ်။ ကနေဒါဟာ TikTok နဲ့ပတ်သက်တဲ့ဆုံးဖြတ်ချက်မချမီ ဘယ်လိုစိုးရိမ်မှုတွေကိုမဆိုဆွေးနွေးဖို့ TikTok ကို မဆက်သွယ်ဘဲ ထုတ်ပြန်ခဲ့တာလို့ ကုမ္ပဏီရဲ့ ပြောရေးဆိုခွင့်ရှိသူတဦးက အီးမေးလ်ပေးပို့တဲ့ ကြေညာချက်ထဲမှာ ပြောခဲ့ပါတယ်။

TikTok ရဲ့ အချက်အလက်စုဆောင်းမှု၊ အသုံးပြုမှုနဲ့ ကိုယ်ရေးကိုယ်တာ အချက်အလက်တွေကို ထုတ်ဖော်တာနဲ့ ပတ်သက်တဲ့ စိုးရိမ်ပူပန်မှုတွေကြောင့် ကနေဒါ ဗဟိုအစိုးရနဲ့ ပြည်နယ်ဆိုင်ရာ ပုဂ္ဂိုလ်ရေးဆိုင်ရာ စည်းကမ်းထိန်းသိမ်းရေးအဖွဲ့တွေဟာ တရုတ်ကုမ္ပဏီ ByteDance Ltd. က ပိုင်ဆိုင်တဲ့ အက်ပ်ကို ပူးတွဲစုံစမ်းစစ်ဆေးနေပါတယ်။

ကနေဒါရဲ့ လုပ်ဆောင်ချက်ဟာ မကြာသေးမီနှစ်တွေအတွင်း အကြောင်းအမျိုးမျိုးကြောင့် တင်းမာလာတဲ့ တရုတ်-ကနေဒါ ဆက်ဆံရေးအတွက် ဆူးတချောင်းလို ဖြစ်လာပါတယ်။

တရုတ်နိုင်ငံဟာ ကနေဒါ ရွေးကောက်ပွဲတွေကို သြဇာလွှမ်းမိုးဖို့ ကြိုးပမ်းခဲ့တယ်၊ လေကြောင်းနဲ့ ရေကြောင်းဆိုင်ရာ စောင့်ကြည့်ရေး လှုပ်ရှားမှုတွေကို လုပ်ဆောင်နေတယ်လို့ ကနေဒါအစိုးရက မကြာသေးမီက စွပ်စွဲခဲ့ပါတယ်။

စွပ်စွဲချက်တွေကို တရုတ်အစိုးရက ငြင်းဆိုထားပြီး မခိုင်လုံတဲ့ ထင်ကြေးပေးမှုနဲ့ အပုပ်ချပြောဆိုမှုတွေကို ရပ်တန့်ဖို့ ကနေဒါအစိုးရကို တိုက်တွန်းထားပါတယ်။