ယူကရိန်းစစ်ပွဲကြောင့် ရုရှားအပေါ် ပိတ်ဆို့အရေးယူမှုတွေကို ပေကျင်းက ချိုးဖောက်ရင် ဝါရှင်တန်ဟာ တရုတ်ကုမ္ပဏီတွေနဲ့ လူပုဂ္ဂိုလ်တွေကို ပစ်မှတ်ထားဖို့ တွန့်ဆုတ်နေမှာ မဟုတ်ဘူးလို့ အမေရိကန် နိုင်ငံခြားရေးဝန်ကြီး အန်တိုနီ ဘလင်ကန်က ဖေဖော်ဝါရီ ၂၈ ရက်မှာ ပြောကြားခဲ့ပါတယ်။

တကယ်လို့ တရုတ်နိုင်ငံဟာ စစ်ပွဲအတွက် မော်စကိုကို လူသေစေတဲ့ အကူအညီတွေ ပေးမယ်ဆိုရင် ကမ္ဘာ့နိုင်ငံတွေနဲ့ ဆက်ဆံရေးမှာ ပေကျင်းအတွက် ပြဿနာကြီးတရပ် ဖြစ်လာလိမ့်မယ်လို့ ဘလင်ကန်က ကာဇက်စတန်နဲ့ ဥဇဘက်ကစ္စတန်တို့ရဲ့ မြို့တော်တွေဆီ သွားတဲ့ ခရီးစဉ်မှာ သတင်းထောက်တွေကို ပြောကြားခဲ့တာပါ။

ကမ္ဘာတဝန်းက နိုင်ငံတွေဆီကနေ ယူကရိန်းစစ်ပွဲနဲ့ ပတ်သက်တဲ့ ဒီစိုးရိမ်မှုတွေကို ပထမဆုံး ထုတ်ပြောလာပြီး ဒါကိုလည်း နိုင်ငံအတော်များများကို မျှဝေပေးခဲ့တာကြောင့် လွန်ခဲ့တဲ့ ဆယ်ရက်ကျော်က ထိတွေ့ဆက်ဆံခဲ့တဲ့ နိုင်ငံတွေဆီကနေ ရှင်းရှင်းလင်းလင်း ကြားသိထားရကြောင်း ဘလင်ကန်က ပြောပါတယ်။

ဒါ့အပြင် ဒီကိစ္စဟာ အမေရိကန်နဲ့ တရုတ်နိုင်ငံတို့ရဲ့ ဆက်ဆံရေးအတွက် ဆိုးရွားတဲ့ ပြဿနာတခု ဖြစ်ရုံသာမက ကမ္ဘာတဝန်းရှိ နိုင်ငံတွေနဲ့ ဆက်ဆံရေးအတွက်ပါ ကြီးမားတဲ့ ပြဿနာတရပ်လည်းဖြစ်ကြောင်း ဘလင်ကန်က ဆိုပါတယ်။

ယူကရိန်းမှာ ရုရှားရဲ့ ရန်စမှုတွေနဲ့ ပတ်သက်လာရင် တရုတ်က ဟိုတမျိုး ဒီတမျိုး လုပ်လို့မရကြောင်း၊ ငြိမ်းချမ်းရေး အဆိုပြုချက်တွေကို တဖက်ကတင်ပြီး ကျန်တဖက်က ရုရှား စပြီးမွှေးခဲ့တဲ့ မီးတောက်တွေကို လောင်စာထပ်ထည့်လို့ မရဘူးလို့လည်း ပြောပါတယ်။

ဒါကြောင့် တရုတ်ဟာ အမေရိကန်တင်မက ကမ္ဘာတဝန်းက တခြားနိုင်ငံတွေကပါ ပြောခဲ့တာတွေကို အလေးအနက်ထားပေးဖို့နဲ့ တရုတ်အနေနဲ့ စစ်ပွဲမှာ ရုရှားကို ရုပ်ပိုင်းဆိုင်ရာ ပံ့ပိုးကူညီမှု နောက်ထပ် ထည့်သွင်းစဉ်းစားခြင်းကနေ ရှောင်ကြဉ်လိမ့်မယ်လို့ မျှော်လင့်ကြောင်း ဘလင်ကန်က ပြောပါတယ်။

အမေရိကတိုက်ထဲကို တရုတ်ရဲ့ သူလျှိုပူဖောင်း ပျံသန်းခဲ့ပြီး သမ္မတ ဂျိုးဘိုင်ဒင်ရဲ့ အမိန့်နဲ့ အမေရိကန် ဂျက်တိုက်လေယာဉ်တွေက ပစ်ချခဲ့ကြောင်း ဝါရှင်တန်က ပြောကြားခဲ့ပြီးနောက်မှာ အမေရိကန်-တရုတ် ၂ နိုင်ငံကြား ဆက်ဆံရေး ယိုယွင်းလာခဲ့တာ ဖြစ်ပါတယ်။

ယူကရိန်းစစ်ပွဲအပေါ် ပေကျင်းရဲ့တုံ့ပြန်မှုကို အနောက်နိုင်ငံတွေက အနီးကပ် စောင့်ကြည့်နေချိန်မှာ အငြင်းပွားမှုလည်း ပေါ်ပေါက်လာခဲ့ပါတယ်။