မက္ကဆီကိုနယ်စပ်မြို့ရှိ စစ်သားတွေဟာ ကိုယ့်အိမ်ကို ကားမောင်းပြန်နေကြတဲ့ ပစ်ကပ် ထရပ်ကားပေါ်က လက်နက်မဲ့ လူငယ် ၅ ယောက်ကို ပစ်သတ်ခဲ့ကြောင်း ဒေသခံ လူ့အခွင့်အရေးအဖွဲ့က ဖေဖော်ဝါရီ ၂၇ ရက်မှာ ပြောကြားလိုက်ပြီး ဒီပစ်ခတ်မှုကို စုံစမ်းစစ်ဆေးပေးဖို့ အစိုးရကို တောင်းဆိုလိုက်ပါတယ်။

အမေရိကန်-မက္ကဆီကိုနယ်စပ်အနီး နူအေးဗိုလာ့ရေ့ဒိုမြို့မှာ ဖေဖော်ဝါရီ ၂၆ ရက်က ကားမောင်းနေတုန်း ပစ်သတ်ခံခဲ့ရတာဖြစ်ပြီး ပစ်သတ်ခံရသူတွေနဲ့ သူတို့ရဲ့ ဆွေမျိုးတွေ ကိုယ်စား ဖက်ဒရယ်အစိုးရရှေ့နေတွေနဲ့အတူ တိုင်ကြားစာကို တင်သွင်းခဲ့ကြောင်း နူအေးဗိုလာ့ရေ့ဒို လူ့အခွင့်အရေးကော်မတီက ကြေညာချက်မှာ ဖော်ပြထားပါတယ်။

ထရပ်ကားထဲက ၆ ယောက်မြောက်လူကတော့ အသက်ရှင်ခဲ့ပြီး သေနတ်ဒဏ်ရာတွေနဲ့ ဆေးရုံတင်ထားရပါတယ်။ အပစ်ခံရသူတွေရဲ့ မိသားစုဝင်တွေနဲ့ အခင်းဖြစ်တဲ့နေရာကို ရောက်လာကြတဲ့ သတင်းထောက်တဦးတို့ကို စစ်တပ်ကနေ အကြမ်းပတမ်း တုံ့ပြန်ခဲ့ကြကြောင်း လူ့အခွင့်အရေးအဖွဲ့က ပြောပါတယ်။

ရိုက်တာသတင်းဌာနရဲ့ ဗီဒီယိုထဲမှာ သေနတ်ပစ်ခံရသူတွေရဲ့ ဆွေမျိုးတွေနဲ့ အိမ်နီးချင်းတွေဟာ သူတို့ကို ခြောက်လှန့်ပစ်ပြေးသွားတဲ့ စစ်သွေးကြွတွေနဲ့ တိုက်ခိုက်ခဲ့ကြတာကို တွေ့မြင်ရပါတယ်။

အဲဒီဗီဒီယိုထဲမှာ အမေရိကန်နိုင်ငံသားဖြစ်တဲ့ အသက် ၂၁ နှစ်အရွယ် ဂူစတာဗို အန်ဂျလ် ဆွာရက်စ် ကက်စ်တီလိုဟာ ဘာသေနတ်မှ သယ်ဆောင်ခဲ့ခြင်းမရှိကြောင်း သူ့ရဲ့ဖခင်က ပြောထားပါတယ်။

မက္ကဆီကို ကာကွယ်ရေးဝန်ကြီးဌာနဟာ မှတ်ချက်ပေးဖို့ တောင်းဆိုချက်ကို ချက်ချင်း မတုံ့ပြန်ခဲ့ပါဘူး။

ရှေ့နေချုပ်ရုံးနဲ့ အမျိုးသားလူ့အခွင့်အရေးကော်မရှင်တို့ဟာ စစ်တပ်နဲ့အတူ ဒီအမှုကို စုံစမ်းစစ်ဆေးနေပြီး သက်သေအထောက်အထားတွေကို စုဆောင်းနေကြောင်း နူအေးဗို လာ့ရေ့ဒို မြို့တော်ဝန် ကာမန် လီလီယာ ကန်တူရိုဆပ်စ်က တနင်္လာနေ့မှာ ပြောပါတယ်။