အမေရိကန်အစိုးရက နွေဦးထိုးစစ်အတွက် ပြင်ဆင်နေတဲ့ ယူကရိန်းအစိုးရအတွက် နောက်ထပ်လက်နက်တွေ ဒေါ်လာ ၂ ဘီလီယံဖိုး ထောက်ပံ့ပေးမယ်လို့ ဖေဖော်ဝါရီ ၂၄ ရက်က ကြေညာခဲ့ပါတယ်။

ယူကရိန်းကို ရုရှားကျူးကျော်မှု ပထမနှစ်ပတ်လည်နေ့မှာ ခုလိုကြေညာတာပါ။ ရုရှားအစိုးရရဲ့ စစ်ပွဲဆင်နွှဲနိုင်မှုကို လျော့ပါးစေဖို့ ရည်ရွယ်ပြီး ရုရှားနဲ့ သူ့မဟာမိတ်တွေအပေါ် ပိတ်ဆို့အရေးယူမှုအသစ်တွေ၊ ပို့ကုန်ထိန်းချုပ်မှုအသစ်နဲ့ အခွန်စည်းကြပ်မှု အသစ်တွေကိုလည်း ကြေညာခဲ့ပါတယ်။

နောက်ထပ် စစ်ရေးအကူအညီထဲမှာ ယူကရိန်းက တောင်းဆိုထားတဲ့ F-16 တိုက်လေယာဉ်တွေ မပါဝင်ပေမဲ့ High Mobility Artillery Rocket Systems (HIMARS) အတွက် နောက်ထပ် ခဲယမ်းမီးကျောက်တွေ၊ Switchblades နဲ့ CyberLux K8 အပါအဝင် မောင်းသူမဲ့လေယာဉ် အမျိုးအစား အများကြီးပါပါတယ်။

ပင်တဂွန်စစ်ဌာနချုပ်မှာလုပ်တဲ့ သတင်းစာရှင်းလင်းပွဲမှာ လေတပ်ဗိုလ်မှူးချုပ် ပက်ထရစ်ရိုင်ဒါက စစ်ရေးအကူအညီ အကြောင်းအရာကို အသေးစိတ် ဖော်ပြခဲ့ပါတယ်။

နောက်ထပ် မောင်းသူမဲ့ ဝေဟင်စနစ်တွေ၊ တန်ပြန် UAS နဲ့ အီလက်ထရွန်နစ် စစ်ဆင်ရေး ထောက်လှမ်းရေးကိရိယာတွေအပြင် အမြောက်တွေနဲ့ အတိအကျ ပစ်ခတ်နိုင်စွမ်းအတွက် အရေးကြီးတဲ့ ခဲယမ်းမီးကျောက်တွေ ပါတယ်လို့ သူက ပြောခဲ့ပါတယ်။

ယူကရိန်းတပ်ဖွဲ့တွေအတွက် စက်ပစ္စည်းအသစ်တွေနဲ့ လေ့ကျင့်ရေးတွေ ပေးတာဟာ “ယူကရိန်းနိုင်ငံသားတွေကို ခုခံကာကွယ်ရုံသာမက စစ်မြေပြင်မှာရှိတဲ့ ညီမျှခြင်းကို ပြောင်းလဲဖို့ ထိုးစစ်ဆင်ဖို့ လိုအပ်တဲ့ စွမ်းရည်တွေကို ယူကရိန်းတွေကို ပေးစေနိုင်တယ်” လို့ ရိုက်ဒါက ပြောပါတယ်။

အမေရိကန် ကာကွယ်ရေးဝန်ကြီး လွိုဒ် အော်စတင်က လွန်ခဲ့တဲ့နှစ်အတွင်း ယူကရိန်းကို စစ်ရေးအကူအညီ ဒေါ်လာ ၃၂ ဘီလီယံကျော် ပေးအပ်ခဲ့ပြီး အမေရိကန်ပြည်ထောင်စုဟာ ယူကရိန်းနိုင်ငံအတွက် ဂျာဗယ်လင် ချပ်ဝတ်တန်ဆာစနစ် ၈,၅၀၀ နဲ့ HIMARS ၃၈ ခု အပါအဝင် စစ်ဘက်ဆိုင်ရာ အကူအညီတွေ ပေးခဲ့တယ်လို့ ပြောပါတယ်။