ဂရိနိုင်ငံမှာ အဆိုးရွားဆုံး ရထားတိုက်မှုကြောင့် သေဆုံးသူ အနည်းဆုံး ၃၈ ဦး ရှိလာပြီး ဒါဇင်နဲ့ချီ ဒဏ်ရာရရှိခဲ့ပြီးနောက်မှာ ဂရိရဲတပ်ဖွဲ့ဟာ လာရစ်ဆာမြို့က မီးရထားဘူတာရုံ အကြီးအကဲကို ဖမ်းဆီးထားပြီး သူ့ကို လူသေမှုနဲ့ ထိခိုက်ဒဏ်ရာ ရရှိစေတဲ့ ပေါ့ဆမှုတွေနဲ့ တရားစွဲဆိုလိုက်ပါတယ်။

သေဆုံးသူအများစုဟာ အားလပ်ရက် ကျောင်းပိတ်ရက်ရှည်က ပြန်လာတဲ့ တက္ကသိုလ်ကျောင်းသားတွေဖြစ်ကြောင်း ယူဆထားကြပြီး သေဆုံးသူဦးရေ ထပ်တိုးလာဖွယ် ရှိကြောင်း တာဝန်ရှိသူတွေက ပြောပါတယ်။

ပဏာမ စုံစမ်းစစ်ဆေးမှုအရ လူအသေအပျောက်များတဲ့ ရထားတိုက်မှုဟာ ရထားနှစ်စင်းအတွက် လမ်းကြောပြောင်းရာမှာ ကြန့်ကြာတာကြောင့်ဖြစ်တယ်လို့ သိရပါတယ်။

ဂရိနိုင်ငံမြောက်ပိုင်း အေသင်မြို့ကနေ ထက်ဆာလိုကီနီမြို့ကို ဦးတည်လာတဲ့ ခရီးသည်တင်ရထားဟာ လာရစ်ဆာမြို့အနီးရှိ ဥမင်လိုဏ်ခေါင်းတခုက ထွက်လာချိန်မှာ တိုက်မိခဲ့တာပါ။

စုံစမ်းစစ်ဆေးရေးမှူးတွေဟာ ရထားနှစ်စင်း ဘာကြောင့် လမ်းကြောင်းတူနေတာလဲ ဆိုတာကို သိရှိဖို့ ကြိုးပမ်းခဲ့ကြပြီး အချက်ပြတာဝန်ခံ နယ်မြေခံရုံပိုင်ကို ဖမ်းဆီးထားတာ ဖြစ်ကြောင်း ရဲအရာရှိတဦးက ပြောပါတယ်။

ခရီးသည်တင်ရထားမှာ ခရီးသည် ၃၄၂ ဦးနဲ့ အမှုထမ်း ၁၀ ဦး တင်ဆောင်ခဲ့ကာ ကုန်တင်ရထားပေါ်မှာ အမှုထမ်းနှစ်ဦး လိုက်ပါခဲ့တာဖြစ်ပြီး အစိုးရပြောရေးဆိုခွင့်ရှိသူ ဂီယန်နစ်စ် အွိုင်ကိုနိုမိုကတော့ ရထားနှစ်စင်းဟာ အချင်းချင်း မတိုက်မိကြခင်မှာ လမ်းကြောင်းတူပေါ်မှာ ကီလိုမီတာပေါင်းများစွာ အရှိန်ပြင်းပြင်း ခုတ်မောင်းနေခဲ့ကြကြောင်း ပြောကြားခဲ့ပါတယ်။

ရထားတိုက်မှုကြောင့် သေဆုံးသူတွေအတွက် အစိုးရက မတ်လ ၁ ရက်မှ ၃ ရက်အထိ နိုင်ငံတော် ဝမ်းနည်းခြင်းအထိမ်းအမှတ်အဖြစ် အလံတွေကို တိုင်တဝက် လွှင့်တင်ထားပါတယ်။

ဂရိသမ္မတ ကက်ထရီနာ ဆာကယ်လာရိုပိုလိုဟာ သူ့ရဲ့ မော်လ်ဒိုဗာခရီးစဉ်ကို ဖြတ်ချလိုက်ပြီး ဂရိကို ပြန်လာခဲ့ပါတယ်။

ဂရိသမ္မတဟာ ဗုဒ္ဓဟူးနေ့မှာ ရထားတိုက်မှုဖြစ်ပွားတဲ့နေရာကို သွားရောက်ခဲ့ပြီး အဖြစ်ဆိုးအတွက် ဝမ်းနည်းကြေကွဲကြောင်း ဖော်ပြခဲ့ကာ ကျန်ရစ်သူမိသားစုတွေကိုလည်း အားပေးခဲ့ပြီး သူတို့အတွက် လိုအပ်တဲ့အကူအညီအားလုံးကို ဂရိအစိုးရက ပံ့ပိုးပေးမှာဖြစ်ကြောင်း ပြောကြားခဲ့ပါတယ်။

ရထားတိုက်မှုဖြစ်ပွားရတဲ့ အကြောင်းရင်းကို အစိုးရက အပြည့်အဝ စုံစမ်းစစ်ဆေးသွားမယ်လို့ ဂရိနိုင်ငံရဲ့ သယ်ယူပို့ဆောင်ရေးဝန်ကြီး ကိုစ်တာစ် ကာရာမန်လိစ်က မတ် ၁ ရက်မှာ ပြောကြားခဲ့ပါတယ်။

အဲဒီမတော်တဆမှုကို တာဝန်ယူတဲ့အနေနဲ့ သယ်ယူပို့ဆောင်ရေးဝန်ကြီး ကာရာမန်လိစ်က ဗုဒ္ဓဟူးနေ့ မွန်းလွဲပိုင်းမှာ သူ့ရဲ့နုတ်ထွက်စာကို တင်သွင်းခဲ့ပါတယ်။