ထိုင်းနိုင်ငံ၊ ဘန်ကောက်မြို့၊ ဆိုင်မိုင်နယ်မြေထဲမှာ မတ်လ ၁၄ ရက်မနက်ပိုင်းက ဒုရဲမှူးအဆင့်ရှိ ရဲအရာရှိ တစ်ယောက် စိတ်ဖောက်ပြန်ပြီး သေနတ်နဲ့ ပစ်ခတ်သောင်းကျန်းနေတာကြောင့် ထိုင်းအမျိုးသားရဲတပ်ဖွဲ့နဲ့ ကွန်မန်ဒိုစစ်သည်တွေက ဝင်ရောက်ပစ်ခတ်ဖမ်းဆီးခဲ့ပါတယ်။

အသက် ၅၁ နှစ်ရွယ်ရှိ ဒုရဲမှူး ကစ်သီကန်ဆိုင်ဘွန်းကန်ဟာ မူးယစ်ဆေးဝါးတိုက်ဖျက်ရေး အမှတ် ၂ က ရဲတပ်ဖွဲ့ဝင်တစ်ဦးဖြစ်ပြီး တပ်ထဲမနေဘဲ ဆိုင်မိုင်နယ်မြေ ကျီလမကွဏ်းလမ်း ဘန့်မန့်ခုံးအမှတ် ၂ အိမ်ရာတိုက်ခန်းမှာနေထိုင်နေပါတယ်။

မတ်လ ၁၄ ရက် မနက်ကတော့ သူဟာ ရပ်ကွက်ထဲဆင်းလာပြီး အကြောင်းမဲ့ သေနတ်နဲ့ ရမ်းသန်း ပစ်ခတ်နေတာကြောင့် ရပ်ကွက်ထဲကလူတွေ ထိတ်လန့်ကြောက် ရွံ့ပြီး ထွက်ပြေး ရှောင်ပုန်းခဲ့ကြရပါတယ်။

တာဝန်ရှိသူတွေရောက်လာတော့ သူဟာ တိုက်ပေါ်ပြန်တက်သွားပြီး ဒုတိယထပ်ရှိ အခန်းတခန်းထဲ ဝင်ရောက်ပုန်းခိုနေပါတယ်။

သူလက်နက်ချဖို့အတွက် အသိမိတ်ဆွေသူငယ်ချင်းတွေရော၊ မိခင်နဲ့မိသားစုဝင်တွေပါလာရောက် ချော့မော့ဖြောင်းဖျခဲ့ပြီး သူနှစ်သက်တဲ့အစားအစာတွေ သွားပို့ပေမဲ့ လက်မခံသလို သီချင်းဆိုပြီး ဖြောင်းဖျညှိနှိုင်းတာလည်း လက်မခံဘဲ တချက် တချက်သေနတ်နဲ့ ပြန်လည်ပစ်ခတ်နေခဲ့ပါတယ်။

သူ့ကိုဖမ်းမိဖို့ ၂၈ နာရီကြာ အမျိုးမျိုးကြိုးစားပေမဲ့ မအောင်မြင်တာကြောင့် မနေ့နေ့လယ် ၁၂ နာရီမှာ ဆေးရုံလူနာတင်ကားအသင့်လာစောင့်ပြီး  တာဝန်ရှိသူက လိုက်ဖ်လွှင့်နေတာတွေ ရပ်တံ့ဖို့ ၊အနီးနားတဝိုက်က သတင်းထောက်တွေ ခပ်ဝေးဝေးမှာသွားနေဖို့ အမိန့် ပေးလိုက်ပါတယ်။ 

ဒီနောက် သူရှိတဲ့အခန်းကို နောက်ဖေးကနေတွယ်တက်သွားကြသလို မျက်ရည် ယိုဗုံးတွေလည်းပစ်ထဲ့လိုက်ပြီး ခဏအကြာ သေနတ်သံတွေဆူညံသွားပြီး ကစ်သီကန်ဆိုင်ဘွန်းကန်ဟာ  ပြတင်းပေါက်ကနေ ဒုတိယထပ်ကို ခုန်ချလိုက်စဉ် အောက်မှာ စောင့်ဆိုင်းနေတဲ့ တာဝန်ရှိသူတွေက ဖမ်းဆီးလိုက်ပါတယ်။

အဆိုပါပစ်ခတ်မှုတွေကြောင့် သေနတ်ဒဏ်ရာ ၆ ချက်ရသွားပြီး ဖူမိဖွန်း ဆေးရုံကို ခေါ်ဆောင်သွားခဲ့ရကာ ည ၉ နာရီကျော်မှာတော့ သူသေဆုံး သွားပြီဖြစ်ကြောင်း ဆေးရုံက ထုတ်ပြန်ခဲ့ပါတယ်။

ကစ်သီကန်ဆိုင်ဘွန်းကန်ဟာ ထိုင်းမြောက်ပိုင်း လမ်းပွန်းခရိုင်ကဖြစ်ပြီး ဥပဒေဘွဲ့ရ ရဲအရာရှိ တဦးဖြစ်ကြောင်း၊ ရဲဝန်ထမ်းသက်တမ်း နှစ်ပေါင်း ၂၀ ရှိပြီး သေနတ်ပစ်ကျွမ်းကျင်ဆုကို အကြိမ်ကြိမ်ရထားသလို တိုက်ခိုက်ရေးသင်တန်းတွေလည်း မကြာခဏတက်ရတာကြောင့် သူ့ကိုအလွယ်တကူမဖမ်းဆီးနိုင်ဘဲ နာရီပေါင်းများစွာအချိန်ပေးခဲ့ရတယ်လို့ ထိုင်းအမျိုး သားရဲတပ်ဖွဲ့ တာဝန်ရှိသူက ပြောပါတယ်။

သူဟာ ဒီမတိုင်ခင်က မူးယစ်ဆေးဝါးနှိမ်နင်းရေးရဲတပ်ဖွဲ့ အမှတ် ၁ မှာရော အမှတ် ၂ မှာပါ တာဝန်ထမ်းဆောင်ပြီး တာဝန်ဝတ္တရားကျေပွန်ကာ လုပ်ဖော်ကိုင်ဘက်နဲ့ လက် အောက်ငယ်သားတွေရဲ့ ချစ်ခင်လေးစားမှုရခဲ့သူဖြစ်တယ်လို့ ဆိုပါတယ်။

မနှစ်ကတော့ ကျန်းမာရေးပြဿနာရှိခဲ့ကြောင်း၊ ချင်းမိုင်ခရိုင် စိတ်ပိုင်းဆိုင်ရာ ဆေးရုံကြီးမှာ တက်ရောက်ကုသခဲ့တဲ့ ရာဇဝင်ရှိကြောင်း၊ ဒါပေမဲ့အခုလိုဖောက်ပြန် သောင်းကျန်းမယ်လို့ ဘယ်သူမှထင်မထားကြောင်း၊ နောက်နောင်အခုလို မဖြစ်ရအောင် ကြိုတင်ကာကွယ်ဖို့ သူ့ရဲ့ကျန်းမာရေးအချက်အလက်နဲ့ ကိုယ်ရေးကိုယ်တာပြဿနာတွေ ထပ်မံစစ်ဆေးသွားမယ်လို့ ရဲ တပ်ဖွဲ့တာဝန်ရှိသူက ပြောပါတယ်။ 

Source: Sanook/TNA/PPTV