မန္တလေးတိုင်း၊ မန္တလေးမြို့မှာ ဧပြီလ ဒုတိယပတ်ကစတင်ပြီး လျှပ်စစ်မီးပြတ်တောက်ချိန်များပြီး ရေပြတ်လပ်မှုကြောင့် မြို့ပေါ်ရပ်ကွက်တွေကို တရက် ရေဂါလံသောင်းချီ လှူဒါန်းနေရတယ်လို့ လူမှုကယ်ဆယ်ရေးအသင်းတွေဆီက သိရပါတယ်။

မန္တလေးမှာ တနေ့ကို လျှပ်စစ်မီး တနာရီကျော်သာ ရရှိတာကြောင့် ရေတင်ဖို့ ရေတင်စက်မောင်းချိန် မရတဲ့အတွက် သောက်သုံးရေပြတ်လပ်မှုတွေ ကြုံတွေ့နေရတာလို့ ဒေသခံတွေက ပြောပါတယ်။

မြို့ခံတဦးက “မီးက တရက် လေးနာရီလာတယ်သာပြောတာ၊ တကယ်လာတာက တနာရီကျော်ပဲ လာတယ်။ ရေချိုးဖို့မရှိလို့ သူများရေရတဲ့နေရာ သွားချိုးရတယ်။ နေကလည်း အရမ်းပူတော့ ရေမချိုးဘဲ နေလို့လည်းမရဘူး။ ရေပြတ်တာတော့ တော်တော်ဆိုးတယ်” လို့ ပြောပါတယ်။

မန္တလေးမြို့မှာ ပြီးခဲ့တဲ့နှစ်တွေအတွင်း အခုလို လျှပ်စစ်မီးပြတ်ပြီး ရေပြတ်တောက်တာ မကြုံဘူးဘဲ အခုနှစ် လျှပ်စစ်မီးပြတ်မှသာ ရေပြတ်တောက်တာ ကြုံဖူးတယ်လို့ သိရပါတယ်။

မြို့ပေါ်တိုက်ခန်းတွေမှာ နေသူတွေအနေနဲ့ ရေရရှိမှု ပိုခက်ခဲပြီး ရေအလှူလာပေးတာကို စောင့်နေရတယ်လို့ ပြောပါတယ်။

“သင်္ကြန်ရက်အတွင်းကဆို သောက်သုံးရေပါ ပြတ်တယ်။ ဘယ်မှာမှကို ဝယ်မရတာ။ ရေအလှူလာပေးတဲ့ ကားလာမှ ရေပုံးဆွဲ ထွက်သယ်ရတယ်။ ဒါမဲ့ ကိုယ့်အိမ်ရေလောက်တော့ သုံးလို့မလောက်ဘူး” လို့ မြို့ခံတဦးက ပြောပါတယ်။

မြို့ပေါ်တိုက်ခန်းတွေမှာ နေသူတွေက ရေမရရှိတာကြောင့် ရေခက်ခဲမှုကို ပိုကြုံတွေ့နေရပြီး ​သောက်ရေသန့်ပုံးဝယ်ယူကာ ချိုးရေအဖြစ် အသုံးပြုနေရတယ်လို့ မြရည်နန္ဒာမှာ နေထိုင်သူက ပြောပါတယ်။ 

မန္တလေးမြို့မှာ လျှပ်စစ်ဓာတ်အား မလုံလောက်မှုကြောင့် အချိန်ပိုင်း အလှည့်ကျ လျှပ်စစ်ဓာတ်အား ဖြန့်ဖြူးပေးနေရပြီး သဘာဝဘေးအန္တရာယ်ကြောင့် လျှပ်စစ်ဓာတ်အား ပြတ်​တောက်ပြီး ရေပေးဝေရေးလုပ်ငန်းတွေ အဆင်မပြေဖြစ်ခဲ့ရတယ်လို့ မန္တလေး လျှပ်စစ်ဓာတ်အားပေးရေး ကော်ပိုရေးရှင်းက ဧပြီ ၁၆ ရက်မှာ ထုတ်ပြန်ထားပါတယ်။