ဝက်စ်ဟမ်းကွင်းလယ်လူ ဒက်ကလန်ရိုက်ဟာ ဘယ်အသင်းမှာမဆိုခြေစွမ်းပြနိုင်ကြောင်း အင်္ဂလန် ကစားသမားဟောင်းတွေဖြစ်တဲ့ ပီတာခရော့ချ်နဲ့ ဂျိုကိုးတို့ကချီးကျူးပါတယ်။

ရိုက်ဟာ ခရစ္စတယ်ပဲလေ့အသင်းနဲ့ပွဲစဉ်မှာ အသင်းခေါင်းဆောင်အဖြစ် ပွဲထွက်ခဲ့ပြီးနောက် ဝက်စ်ဟမ်းအတွက် ပရီးမီးယားလိဂ်ပွဲ ၂၀၀ ပြည့်မြောက်ခဲ့တဲ့ ပဉ္စမမြောက်ကစားသမား ဖြစ်လာခဲ့ပါတယ်။

အသင်းနဲ့ စာချုပ်သက်တမ်းတစ်ရာသီသာကျန်ရှိတော့ပြီး ထိပ်တန်းကလပ်တွေက သူ့ကို ခေါ်ယူလိုနေကြတာပါ။

ရိုက်ဟာ ကွင်းလယ်နေရာစုံမှာ အကောင်းဆုံးကစားနိုင်ပြီး ဂိုးသွင်းအားသိပ်မကောင်းပေမဲ့ သူ့ရဲ့နေရာက ဂိုးသွင်းဖို့အဓိကမဟုတ်ကြောင်း၊ အင်္ဂလန်ကစားသမားဟောင်း ပေါ်လ်ဂစ်ကွိုင်နီလို ကစားသမားဖြစ်ကြောင်း ဂျိုကိုးကပြောပါတယ်။

ပီတာခရော့ချ်ကတော့ မန်ယူ၊ မန်စီးတီး၊ အာဆင်နယ်၊ ချဲလ်ဆီး ဘယ်အသင်းကိုပဲ ပြောင်းရွှေ့သည်ဖြစ်စေ ဒက်ကလန်ရိုက်က အကောင်းဆုံး ခြေစွမ်းပြနိုင်ကြောင်း၊ ချန်ပီယံလိဂ်ကစားချင်တဲ့ သူ့ရဲ့အိပ်မက်ကို ဝက်စ်ဟမ်းပရိသတ်တွေက နားလည်ပေးလိမ့်မယ်လို့ ထင်ကြောင်း ပြောသွားပါတယ်။