ဘရိုက်တန်အသင်းသားတွေအနေနဲ့ နှစ်ပွဲဆက်တိုက်နိုင်ပွဲပျောက်ဆုံးခဲ့တာကို ဝုဗ်အသင်းကို ၆ ဂိုးသွင်းပြီး ပေါက်ကွဲပြနိုင်ခဲ့ကြောင်း နည်းပြဒီဇာဘီကပြောပါတယ်။

ဘရိုက်တန်အသင်းဟာ ဝင်ဘလေကွင်းမှာ မန်ယူအသင်းကို ပင်နယ်တီအဆုံးအဖြတ်နဲ့ ရှုံးနိမ့်ပြီး အက်ဖ်အေဖလားဆီမီး ဖိုင်နယ်ကနေထွက်ခဲ့ရသလို ပရီးမီးယားလိဂ်မှာလည်း နော်တင်ဟမ်ဖောရက်စ်ကို ၃ ဂိုး ၁ ဂိုးနဲ့ ထပ်မံရှုံးနိမ့်ခဲ့တာပါ။ 

မနေ့ညက ကစားခဲ့တဲ့ ဝုဗ်အသင်းနဲ့ပွဲမှာတော့ ဘရိုက်တန်အသင်းက ၆ ဂိုး ဂိုးမရှိနဲ့ နိုင်ပွဲပြန်ယူခဲ့တာပါ။ 

အက်ဖ်အေဆီမီးဖိုင်နယ်ပွဲစဉ်မှာ အနိုင်ရဖို့ ထိုက်တန်ခဲ့ပေမဲ့ ရှုံးနိမ့်ခဲ့ရကြောင်း၊ အဲဒီပွဲအကျိုးဆက်က နော်တမ်ဟမ်ကိုရှုံးနိမ့်စေခဲ့ကြောင်း နည်းပြ ဒီဇာဘီက ပြောပါတယ်။

ဝုဗ်နဲ့ပွဲမှာတော့ အဲဒီပွဲစဉ်က အရှုံးရလဒ်တွေအတွက် ဂုဏ်သိက္ခာရှိရှိနဲ့ အကောင်းဆုံးကစားပြပြီး ပေါက်ကွဲပြခဲ့ကြောင်း၊ ဝုဗ်ကို ၆ ဂိုးပြတ်အနိုင်ရတဲ့ပွဲဟာ နည်းပြဘဝတလျှောက် အကောင်းဆုံးပွဲစဉ်ဖြစ်ကြောင်း ဒီဇာဘီက ပြောပါတယ်။

နည်းပြဒီဇာဘီဟာ ဝုဗ်နဲ့ပွဲမှာ အမာခံကစားသမားလေးဦးလောက်ကို အနားပေးပြီး ကစားခဲ့တာဖြစ်ပေမဲ့ ဂိုးပြတ်နိုင်ပွဲရယူနိုင်ခဲ့တာ ဖြစ်ပါတယ်။