ကမ္ဘာတဝန်းရှိ ကလေး ၅၀၀ မှ ၆၀၀ ကြားကို မွေးဖွားအောင် သုက်ပိုးလှူဒါန်းပေးခဲ့တဲ့ ဒတ်ခ်ျ အမျိုးသားကို နောက်ထပ် သုက်ပိုးလှူဒါန်းတာ ရပ်တန့်ဖို့ နယ်သာလန်တရားရုံးက ဧပြီ ၂၈ ရက်မှာ အမိန့်ထုတ်လိုက်ပါတယ်။ 

ဂျိုနသန် မယ်ယာလို့ သတင်းစာမှ နာမည်ဖော် ရေးသားထားတဲ့ အသက် ၄၁ နှစ်အရွယ် အမျိုးသားကို ဆေးခန်းတွေဆီ သုက်ရည်တွေ ထပ်ပြီးလှူဒါန်းမှု တားမြစ်ထားကြောင်း တရားရုံးစီရင်ချက်မှာ ဖော်ပြထားပါတယ်။ 

တားမြစ်ချက်ကို ၁ ခါ ချိုးဖောက်ရင် ယူရိုငွေ ၁ သိန်း ဒဏ်ရိုက်ခံရမှာပါ။ သူ့သုက်ရည်နဲ့ ကလေးရထားပြီးသား မိဘတွေအတွက် သီးသန့်ဖယ်ထားတာတွေကလွဲရင် သူတို့ဆီမှာ ရှိထားပြီးသား သူ့ရဲ့သုတ်ရည်တွေကို ဖျက်ဆီးပစ်ဖို့ကို နိုင်ငံခြားရှိ ဆေးခန်းတွေဆီ စာရေး အကြောင်းကြားဖို့ တရားရုံးက မယ်ယာ ကို အမိန့်ပေးခဲ့ပါတယ်။ 

သုက်ပိုးအလှူခံ ကလေးတွေရဲ့ အကျိုးစီးပွားကို ကိုယ်စားပြုတဲ့ Stichting Donorkind ဖောင်ဒေးရှင်းနဲ့ မယ်ယာကို သုက်ပိုး အလှူရှင်အဖြစ် အသုံးပြုခဲ့တဲ့ ဒတ်ခ်ျမိဘတွေက စတင်ခဲ့တဲ့ အရပ်ဖက်အမှုတခုအပြီးမှာ ဒီဆုံးဖြတ်ချက် ထွက်လာတာပါ။ 

မယ်ယာရဲ့ သုက်ပိုး ဆက်လှူဒါန်းနေတာတွေဟာ သူ့သုက်ပိုးအလှူခံရရှိတဲ့ ကလေးတွေရဲ့ ကိုယ်ပိုင် ဘဝနေထိုင်ခွင့်ကို ချိုးဖောက်ရာရောက်နေပြီး အဲဒီကလေးတွေ အချင်းချင်း ချစ်ကြိုက်သွားနိုင်တဲ့ ဆက်ဆံရေးမျိုးမှာ မတော်တဆ ပေါင်းသင်းမိခြင်းနဲ့ မျိုးဆက်ပွားခြင်းတို့ ဖြစ်မှာကို စိုးရိမ်ကြောက်ရွံ့ပြီး ဟန့်တားရတာဖြစ်ကြောင်း ငြင်းခုံနေကြပါတယ်။ 

မယ်ယာရဲ့ အစုလိုက်အပြုံလိုက် သုက်ပိုးလှူဒါန်းမှုဟာ ၂၀၁၇ ခုနှစ်မှာ စတင်ခဲ့ပြီး သူ့သုက်ပိုးနဲ့ ကလေးပေါင်း ၁၀၀ ကျော် ကို မွေးပေးခဲ့တဲ့ ဒတ်ချ် သားဖွားမီးယပ် ဆေးခန်းတွေကလည်း သူ့ကိုတားမြစ်ထားပါတယ်။ 

ဒါပေမဲ့ မယ်ယာဟာ နိုင်ငံတကာမှာ လည်ပတ်နေတဲ့ ဒိန်းမတ်သုတ်ပိုးဘဏ် Cryos အပါအဝင် ပြည်ပကို ဆက်လှူနေတာပါ။ 

မယ်ယာဟာ သုက်ပိုးအလှူရှင်တွေကို မျှော်နေကြတဲ့ မိဘတွေနဲ့ ယှဉ်တွဲပေးတဲ့ ဆိုက်တွေမှာ သူ့ကိုယ်သူ အလှူရှင်အဖြစ် ဆက်လက် ကမ်းလှမ်းနေပါတယ်။ 

Stichting Donorkind ဖောင်ဒေးရှင်းရဲ့ ဘုတ်အဖွဲ့ဝင် Ester de Lau က အဲဒီစီရင်ချက်ကို ကြိုဆိုပေမယ့် နယ်သာလန်အစိုးရအနေနဲ့ အလားအလာရှိတဲ့ ဖခင်တွေကို အပြန်အလှန် စစ်ဆေးဖို့အတွက် အလှူရှင်တွေရဲ့ ပြည်တွင်းပြည်ပ ဒေတာဘေ့စ်တစ်ခု ဖန်တီးဖို့ လိုအပ်ကြောင်း ရိုက်တာစ်သတင်းဌာနနဲ့ အွန်လိုင်းအင်တာဗျူးမှာ ပြောပါတယ်။