Rüfət Səfərov
Məlum olduğu kimi, artıq beşinci rayon icra hakimiyyətinin başçısı- Vilyam Hacıyev qandallandı. Bir müddət öncə özünü gicliyə qoyub, İmişlidə kirayə qaldığı, zülm çəkdiyi barədə açıqlama verən Vilyamın xidməti kabinetindən xüsusilə külli miqdarda vəsait aşkar edildi. Üstəlik, Korrupsiyaya qarşı Mübarizə Baş İdarəsininin hansısa idarəsində prokuror işləmiş “tpoy” oğlunun dəyəri yüz minlərlə ölçülən avtomobillərinin fotoları manşetləri bəzədi.
Söz yox, mən bu və ya digər mətn və nitqlərimdə dəfən-dəfən önə çəkmişəm ki, hazırkı həbslər hakimiyyətin korrupsiya və rüşvətə qarşı səmimi mübarizəsindən xəbər vermir, sadəcə, xalqın gözündən plintusun dibinə düşən iqtidar hər vəchlə insanların gözlərinə kül üfürür, səbatsız “siyasi rejissorlar” tərəfindən “korrupsiya tamaşası” düzənlənir ki, bəlkə diqqətsiz “tamaşaşçı”lar nələrəsə inansın… Amma çifayda! Hamıya gün kimi aydındır ki, məsələn, bu ölkənin bir saylı korrupsioneri olmuş Ziya Məmmədov və ya misalaçün, bir saylı rüşvətxoru olan Ramiz Mehdiyev, Kəmaləddin Heydərov, üzQarası Zakir şellənir. Demək ki, dediyim kimi, bütün baş verənlər hakimiyyətin ömrünün uzadılmasına hesablanıb-“bala”ların ayaq altında qalıb məhvi bahasına olsa belə…
Nə isə. Hər zamankı kimi fikirlərimi faktaloji əsaslar üzərində quracam, elə buradan dövlət başçısı İlham Əliyevə və birinci xanınm Mehriban Əliyevaya müraciət edəcəm. Məlumunuz olsun ki, sizin ötən gün haqlı olaraq həbs etdirdiyiniz İmişli Rayon İcra Hakimiyyətinin başçısı Vilyam Hacıyev hazırda DTX-nın İstintaq Təcridxanasında saxlanılır. Bir qədər əvvəl həmin təcridxanada işləyən vətənpərvər rütbə sahiblərindən biri Vilyamın qudurğan oğlunun atasına gətirdiyi sovqat dolu çantanın fotosunu (çantanın yanındakı ayaqlar Vilyamın oğluna aiddir-müəllif) çəkərək mənə göndərdi. Üstəlik, nəzərimə çatdırdı ki, Vilyamın prokurorluq əməkdaşı ola-ola dəyəri bir milyona yaxın olan avtomobil ilə şəhərin küçələrini dolanıb, “ruçnoy” dartan, təkər qaldıran oğlu Mamed təcridxananın əməkdaşları ilə son dərəcə kobud danışıb, az sonra kənara çəkilərək hansısa yüksək rütbəliyə zəng etdikdən sonra 2 telefonun, 2 sim-kartın, 1 Notebookun atasına ötürülməsinə nail olub. Hətta nömrələrə kontur yükləməyi unudan binəva sürücünü əməkdaşların gözləri önündə ağır formada təhqur edib.
İndi mənimçün, eləcə də həmfikirlərimçün maraqlıdır, işlədiyi rayonların əhalisinə qan ağladan, mayası korrupsiya və rüşvətdən mayalanan məmurlar cəza evinə göndərilir, yoxsa sanatoriyaya?
Amma yeganə “təqsiri” xalqın sözünü deyib, həqiqətləri hayqırmaq olan Tofiq Yaqublu kimi vətən uğrunda canını qoymuş şəxsiyyəti qondarma və uydurma əsaslarla həbs etmək azlıq edir, üstəlik, bir aydır ki, hər hansı sovqat, bağlama, geyim və s. qəbul edilmir. İnsanın bir ay eyni alt və üst paltarında olmasını təsəvvür edirsinizmi, hörmətli dövlət başçısı və birinci xanım?
Bunları nəyə görə qeyd etdim? Uyğun bilsəniz, bir aidiyyəti səlahiyyətli şəxslərlə əlaqə saxlayın, bu barədə hesabat istəyin. İnanmaq istəyirəm ki, mənə həmin foto və məlumatları təqdim edən əməkdaşın məhv edilməsinin qarşısını alacaqsınız.