ထိုင်းနိုင်ငံတွင်းမှာ ထုတ်လုပ်တဲ့ AstraZeneca ကိုဗစ်-၁၉ ကာကွယ်ဆေး ၆ သန်းကို အခုလထဲမှာ ဖြန့်ချိနိုင်တော့မှဖြစ်တယ်လို့ ပြည်သူ့ကျန်းမာရေးဝန်ကြီးဌာနဝန်ကြီး အနုတင် ချန်ဝီရာကူးလ်က အတည်ပြုပြောဆိုပါတယ်။

“ဒေသတွင်း ထုတ်လုပ်တဲ့ AstraZeneca ကာကွယ်ဆေးကို လာမယ့် ဇွန် ၇ ရက် ကစတင်ပြီးတော့ ရရှိနိုင်တော့မှာ ဖြစ်ပါတယ်။ ကုမ္ပဏီအနေနဲ့ အခုလအတွင်း ကာကွယ်ဆေး ၆ သန်းထိ ရရှိနိုင်ဖို့ မျှော်မှန်းထားပြီး ဖြန့်ချိမှုတွေ စတင်သွားမှာ ဖြစ်ပါတယ်”

တချိန်တည်းမှာပဲ ထိုင်းနိုင်ငံ ခရိုင် ၅၈ ခုမှာ ကိုဗစ်-၁၉ ရောဂါထိန်းချုပ်ရေးဌာနက ဒီကနေ့မှာ ပထမအကြိမ်အဖြစ် AstraZeneca ကိုဗစ်-၁၉ ကာကွယ်ဆေး ၂၄၀၀၀၀  ထိုးနှံပေးခဲ့တယ်လို့ ဆိုပါတယ်။

“နောက်ထပ် ကာကွယ်ဆေး ၃ သိန်းခွဲကိုတော့ ကျန်တဲ့ ခရိုင် ၁၉ ခုကို သီတင်း ၂ ပတ်အတွင်း ပို့ဆောင် ထိုးနှံပေးသွားမှာ ဖြစ်ပါတယ်”

အဆိုပါ ခရိုင် ၁၉ ခုထဲမှာတော့ ဘန်ကောက်၊ နွန်ထဘူရီ၊ ပထုံဌာနီ၊ အယုဒ္ဒယ၊ လော့ပ်ဘူရီ၊ ဆာရာဘူရီ၊ ဆင်ဘူရီ၊ အန်ထောင်၊ ကန်ချနဘူရီ၊ နခွန်ပထုံ၊ ဖက်ချဘူရီ၊ ရက်တ်ချဘူရီ၊ ဆမွတ်ဆောင်ခရန်၊ ဆမွတ်ဆာခွန်၊ ချာချွန်ဆောင်၊ ချွန်ဘူရီ၊ ပရာချင်ဘူရီ၊ ရာယောင်နဲ့ ဆမွတ်ပရာကန်ဒေသတွေ ဖြစ်တယ်လို့ သတင်းမှာ ဖော်ပြပါတယ်။

နောက်ထပ် Sinovac ကိုဗစ်-၁၉ ကာကွယ်ဆေး ၂ သိန်းကိုတော့ အခုလထဲမှာပဲ နိုင်ငံတဝန်းလုံး ဖြန့်ချိသွားမယ်လို့ ဆိုပါတယ်။      

ကိုဗစ်-၁၉ တတိယလှိုင်း ကူးစက်မှုတွေ မြင့်တက်နေတဲ့ ထိုင်းနိုင်ငံတဝန်းမှာတော့ လတ်တလောအချိန်ထိ ရောဂါကူးစက်ခံရသူပေါင်း ၁၆၀၀၀၀  ကျော်နဲ့ သေဆုံးသူ ၁၁၀၀ ကျော်ထိ ရှိလာနေပြီ ဖြစ်ပါတယ်။