အမေရိကန်နိုင်ငံမှာ ကိုဗစ်-၁၉ ကပ်ရောဂါ ကူးစက်ခံ သေဆုံးသူဦးရေ ၆ သိန်း လောက်ရှိပြီမို့ ပြည်သူတွေ ကာကွယ်ဆေးထိုးကြဖို့ သမ္မတ ဂျိုးဘိုင်ဒင်က တိုက်တွန်းလိုက်ပါတယ်။

ကိုဗစ်-၁၉ ကူးစက် ကပ်ရောဂါက ဖြည်းဖြည်းချင်း အရှိန်လျော့လာနေပေမယ့် စိတ်ချလက်ချ မပေါ့ဆကြဖို့ကိုလည်း သမ္မတ ဘိုင်ဒင်က ဆော်သြပါတယ်။

“ ကျနော်တို့ဟာ ဝမ်းနည်းစရာ မိုင်တိုင်တခုဆီ ချဉ်းကပ်လာနေတယ်။ အမေရိကန်မှာ ကိုဗစ်-၁၉ ကပ်ရောဂါ ကူးစက်ခံ သေဆုံးသူဦးရေဟာ ၆ သိန်းနီးပါး ရှိလာပြီ။ ဒါကြောင့် ကျနော် ဆက်ပြောမယ်။ တကယ်လို့ ခင်ဗျားတို့ ကာကွယ်ဆေး မထိုးထားဘူးဆိုရင် ကာကွယ်ဆေးထိုးကြပါ၊ ဖြစ်နိုင်သမျှ အမြန်ဆုံး ကာကွယ်ဆေးထိုးကြပါ”လို့  ဇွန်လ ၁၄ ရက်က ဘရပ်ဆဲလ်မြို့တော် နေတိုး ထိပ်သီးညီလာခံမှာ  သမ္မတ ဘိုင်ဒင်က တိုက်တွန်းပြောပါတယ်။