မကွေးတိုင်းဒေသကြီးအတွင်းမှာ ဇွန် ၂၃ ရက်နေ့က ကိုဗစ်-၁၉ အတည်ပြုလူနာ  ၁၀ ယောက်တွေ့ရှိခဲ့တယ်လို့ ပရဟိတအဖွဲ့တွေဆီကနေ သိရပါတယ်။

အဲဒီအတည်ပြုလူနာတွေကတော့ ငဖဲမြို့နယ်က ၅ ယောက်၊ ပခုက္ကူမြို့နယ်က ၄ ယောက်နဲ့ တောင်တွင်းကြီးမြို့နယ်က ၁ ယောက်တွေ့ရှိတာလို့ ပရဟိတ အဖွဲ့ဝင်တစ်ယောက်က DVB ကို ပြောပါတယ်။

ငဖဲမြို့နယ်က ၅ ယောက်ကတော့ မကွေးမြို့ KTV တစ်ခုက ပြန်လာကာ မိသားစုဝင်တွေနဲ့ ထိစပ်တဲ့သူတွေကို ကူးစက်တာဖြစ်ပြီး အဲဒီ KTV ဝန်ထမ်းတွေမှာလည်း အနံ့ပျောက်ဖျားနာတဲ့ သူတွေရှိနေတယ်လို့ဆိုပါတယ်။

ပခုက္ကူမြို့မှာ ကိုဗစ်-၁၉ သံသယဖြစ်သူ ၆ ယောက်ကို စစ်ဆေးရာ ၄ ယောက်မှာ ကိုဗစ်-၁၉ ရောဂါပိုးတွေ့ရှိခဲ့ပြီး ပခုက္ကူခရိုင်ပြည်သူ့ဆေးရုံကြီးအရှေ့ဘက်က ဖျားနာဆောင်မှာ ကုသပေးနေတယ်လို့ သိရပါတယ်။

တောင်တွင်းကြီးမြို့နယ်က အတည်ပြုလူနာကတော့ ဇွန် ၂၂ ရက်နေ့က အတည်ပြုလူနာတစ်ယောက်ဖြစ်တဲ့ သက္ကယ်ကျင်းရွာမှာတာဝန်ထမ်းဆောင်နေတဲ့ ဝန်ထမ်း အမျိုးသားနဲ့ ထိစပ်တဲ့သူဖြစ်တယ်လို့ သိရပါတယ်။