အာဖဂန်နစ္စတန်နိုင်ငံထဲက အမေရိကန်စစ်တပ်တွေ ပြန်ဆုတ်ခွာမှု ပြီးစီးလို့ နှစ်၂၀ စစ်ပွဲ အဆုံးသတ်ချိန် သြဂုတ် ၃၀ ရက်က မြို့တော်ကဘူးလ်မှာ အောင်ပွဲခံတဲ့အနေနဲ့ သေနတ်တွေ ပစ်ဖောက်ခဲ့ကြပါတယ်။

အမေရိကန်အစိုးရနဲ့ မြောက်အတ္တလန္တိတ် မဟာမိတ်အဖွဲ့ နေတိုးတို့ရဲ့ တပ်တွေဟာ အာဖဂန်ကနေ အလျင်စလို ဆုတ်ခွာခဲ့ရတာပါ။

ဖရိုဖရဲ ကယ်ဆယ်ရေးလုပ်ငန်းတွေအပြီးမှာ  အနောက်နိုင်ငံတွေကို ကူညီခဲ့ဖူးတဲ့  ဘေးကင်းရာကို ရွှေ့ပေးဖို့လိုအပ်နေတဲ့ အာဖဂန်နိုင်ငံသား ထောင်ချီကို ချန်ထားခဲ့တယ်လို့ ရိုက်တာမှာ ရေးပါတယ်။

“နောက်ဆုံး အမေရိကန်စစ်သည်က ကဘူးလ်လေဆိပ်ကနေ ထွက်သွားပြီဖြစ်လို့ ကျနော်တို့ နိုင်ငံဟာ ပြီးပြည့်စုံတဲ့ လွတ်လပ်ရေးကို ရပြီ”လို့ တာလီဘန် ပြောခွင့်ရ ကာရီယူဆွတ်ဖ်က အယ်လ်ဂျားဇီးယား ရုပ်သံကို ဩဂုတ် ၃၀ ရက်မှာ ပြောပါတယ်။

အာဖဂန်နစ္စတန်နိုင်ငံထဲကနေ ထွက်ခွာချင်တဲ့ လူတိုင်းအတွက် ဘေးကင်းတဲ့ လမ်းကြောင်းကို ခွင့်ပြုမယ်ဆိုတဲ့ တာလီဘန်တွေရဲ့ ကတိစကားကို ကမ္ဘာကြီးက ဆုပ်ကိုင်ထားမယ်လို့ အမေရိကန် သမ္မတ ဂျိုးဘိုင်ဒင်က ဆုတ်ခွာအပြီး ထုတ်ပြန်တဲ့ ကြေညာချက်ထဲမှာ ပြောထားပါတယ်။

အာဖဂန်ကနေ အမေရိကန်တပ်တွေ ပြန်ဆုတ်ရေး ဘိုင်ဒင် သတ်မှတ်ထားတဲ့ နောက်ဆုံးရက် ဩဂုတ် ၃၁ ရက်နေ့မတိုင်ခင်မှာ ဆုတ်ခွာရေး ပြီးစီးခဲ့တာပါ။

တာလီဘန်တွေက ဒီလအစောပိုင်းကစပြီး လျှပ်စီးလက်သလို ထိုးစစ်နဲ့ ကဘူးလ်မြို့တော်ကို သိမ်းပိုက်ခဲ့အပြီး အာဖဂန်နစ္စတန်နိုင်ငံထဲက အခြေအနေကို ကိုင်တွယ်မှုနဲ့ ပတ်သက်လို့ ဘိုင်ဒင်ကို ရီပတ်ဗလစ်ကင်ပါတီဝင်တွေကရော ဒီမိုကရက်ပါတီဝင်တွေကပါ အကြီးအကျယ် ဝေဖန်ခဲ့ကြပါတယ်။