ဗီယက်နမ် အမျိုးသားတယောက်ဟာ နေအိမ်ကွာရန်တင်း စည်းမျဉ်းစည်းကမ်းတွေ ချိုးဖောက်ကာ ကိုဗစ်-၁၉ ရောဂါ ပျံ့နှံ့စေမှုနဲ့ တရားစွဲဆိုခံခဲ့ရပြီး ထောင်ဒဏ် ၅ နှစ် ချမှတ်ခံခဲ့ရပါတယ်။

အသက် ၂၈ နှစ်အရွယ် လီဗန်ထရိုင်ဟာ ပြီးခဲ့တဲ့ ဇူလိုင် ၇ ရက်က ကိုဗစ်-၁၉ ရောဂါပိုးတွေ့ရှိခဲ့တာမို့ နေအိမ်မှာ ၂၁ ရက်ကြာ ကွာရန်တင်းဝင်နေခဲ့ချိန်မှာ စည်းမျဉ်းစည်း ကမ်းချိုးဖောက်ပြီး ခရီးသွားလာရာကနေ တခြားသူတွေ ကူးစက်ခံခဲ့ရတယ်လို့ တရား ရုံးအစီရင်ခံစာမှာ ဖော်ပြပါတယ်။

ထရိုင်ရဲ့ ခုလို ကွာရန်တင်းစည်းမျဉ်းစည်းကမ်းဖောက်မှုကနေ တခြားသူတွေကို ရောဂါကူးစက်မှုတွေ ဖြစ်လာခဲ့ပြီး ကူးစက်ခံရသူတွေထဲက တယောက်ကတော့ ဩဂုတ် ၇ ရက်မှာ သေဆုံးခဲ့ပါတယ်။

ဒေသတွင်းသတင်းမီဒီယာတွေမှာတော့ ထရိုင်ဆီကတဆင့် ရောဂါကူးစက်ခံရသူ ၈ ယောက်အထိ ရှိခဲ့တယ်လို့ ဖော်ပြပါတယ်။

ပြီးခဲ့တဲ့ နှစ်တုန်းက ကိုဗစ်-၁၉ ရောဂါကူးစက်မှုနှုန်း အနိမ့်ဆုံးနဲ့ ထိန်းထားနိုင်ခဲ့တဲ့ ဗီယက်နမ်နိုင်ငံမှာ အခုအချိန်မှာတော့ ရောဂါကူးစက်မှုတွေ မြင့်တက်လာနေခဲ့ပြီး ရောဂါ ကူးစက်ခံရသူပေါင်း ၅၄၀,၀၀၀ နီးပါးနဲ့ သေဆုံးသူ ၁၃,၀၀၀ ကျော်လာနေပြီ ဖြစ်ပါတယ်။

ရောဂါကူးစက်မှုနဲ့ သေဆုံးမှုတွေဟာ ပြီးခဲ့တဲ့ ဧပြီလကုန်ပိုင်းလောက်က စတင်မြင့် တက်လာခဲ့တာဖြစ်ပြီး မြို့တော် ဟနွိုင်းနဲ့ စီးပွားရေးဗဟိုချက်မမြို့တော် ဟိုချီမင်းမြို့ တော်တွေမှာတော့ လော့ခ်ဒေါင်းချရတဲ့အထိ ကူးစက်မှုတွေ မြင့်တက်နေခဲ့တာပါ။

ဗီယက်နမ်နိုင်ငံမှာတော့ ခုလိုမျိုး စည်းမျဉ်းစည်းကမ်းတွေ ချိုးဖောက်ကာ ကိုဗစ်-၁၉ ရောဂါ ပျံ့နှံ့စေမှုနဲ့အရေးယူတာမျိုးတွေ အရင်ကလည်း ရှိခဲ့ပြီး ဇူလိုင်လတုန်းက အသက် ၃၂ နှစ်အရွယ် အမျိုးသားတယောက်ကို ထောင်ဒဏ် ၁၈ လနဲ့ ဗီယက်နမ် လေကြောင်းလိုင်းဝန်ထမ်းတယောက်ကို အလားတူ အမှုနဲ့ မတ်လတုန်းက ထောင်ဒဏ် ၂ နှစ် ချမှတ်ခဲ့ပါတယ်။