တနင်္သာရီဒေသတွင်း ပြည်သူ့ကာကွယ်ရေးတပ်ဖွဲ့(PDF)တွေအတွက် လိုအပ်တဲ့ အကူအညီတွေ ထောက်ပံ့သွားဖို့ ရည်ရွယ်ကာ ထားဝယ်အခြေစိုက် ကျောင်းသားသမဂ္ဂ တွေက ကမ်ပိန်းတခု ပြုလုပ်နေပါတယ်။

စစ်အာဏာရှင်စနစ် ချုပ်ငြိမ်းဖို့အတွက် တော၊တောင်ထဲမှာ လေ့ကျင့်နေတဲ့ ပြည် သူ့ကာကွယ်ရေးတပ်ဖွဲ့တွေကို တတ်နိုင်တဲ့ဘက်က ကူညီထောက်ပံ့ပေးဖို့ အထူးလိုအပ် နေတာမို့ ဒီကမ်ပိန်းကို ပြုလုပ်ရခြင်းဖြစ်တယ်လို့ ဆိုပါတယ်။

“၃၀၀၀ စီလှူကြစို့”လို့ အမည်ပေးထားတဲ့ ဒီကမ်ပိန်းကိုတော့ ထားဝယ်အခြေစိုက် တက္ကသိုလ်/ကောလိပ်ကျောင်းသားသမဂ္ဂများနဲ့ ထားဝယ်နည်းပညာတက္ကသိုလ် ကျောင်း သားများသမဂ္ဂတို့ ပူးပေါင်းပြုလုပ်တာဖြစ်ပြီး စက်တင်ဘာ ၈ ရက်ကနေ ၁၄ ရက်နေ့ထိ ၇ ရက်ကြာ အလှူငွေကောက်ခံသွားမယ်လို့ ဆိုပါတယ်။

ပါဝင်လှူဒါန်းလိုတဲ့ ပြည်သူတွေအနေနဲ့ အလှူငွေကျပ် ၃၀၀၀ ကစတင်လှူဒါန်း နိုင်သလို ၃၀၀၀ ကျပ်အောက် ထည့်ဝင်လှူဒါန်းလိုသူတွေလည်း Page chat box၊ ဒါမှ မဟုတ် Telegram- @DTUSU1 နဲ့ Instagram  dtu_students_union တို့မှာ လာ ရောက်ဆက်သွယ်လှူဒါန်းနိုင်မှာ ဖြစ်ပါတယ်။

အမျိုးသားညီညွတ်ရေးအစိုးရ(NUG)၊ ကာကွယ်ရေးဝန်ကြီးဌာနကလည်း ပြီးခဲ့တဲ့ ဩဂုတ် ၁၂ ရက်က စတင်ကာ တော်လှန်ရေးအတွက် အမေရိကန်ဒေါ်လာ ၅ သန်း ပမာဏ ရှိ Raffle Ticket အလှူငွေကောက်ခံရောင်းချခဲ့ပါတယ်။

မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်က စတင်ပြီး အကြမ်းဖက်စစ်အုပ်စုက မတရား အာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေးကာလဟာ ၇ လကျော် ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီးထောင်ချခံရသူတွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာ ကွယ်ရေးတပ်တွေနဲ့ စစ်ကောင်စီတပ်တွေကြားတိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ်ပြန်ချက်အရ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ်မှုကြောင့် အပြစ်မဲ့ကျဆုံး ပြည်သူ ၁၀၆၀ နီးပါး ရှိလာခဲ့ပြီလို့ ဆိုပါတယ်။