ဟန်ဂေရီနိုင်ငံကနေ AstraZeneca ကိုဗစ်-၁၉ ကာကွယ်ဆေး ၄ သိန်း ဝယ်ယူဖို့ ထိုင်းအစိုးရက အောက်တိုဘာ ၅ ရက်မှာ အတည်ပြုလိုက်တယ်လို့ ဘန်ကောက်ပို့စ်သတင်းမှာ ဒီကနေ့ ဖော်ပြပါတယ်။

ဒါ့အပြင် အိုက်စ်လန်နိုင်ငံက လှူဒါန်းမယ့် Pfizer ကိုဗစ်-၁၉ ကာကွယ်ဆေး ၁ သိန်းနဲ့ ဂျာမနီနိုင်ငံက လှူဒါန်းမယ့် AstraZeneca ကိုဗစ်-၁၉ ကာကွယ်ဆေး ၃၄၆,၀၀၀ ကိုလည်း လက်ခံရယူသွားဖို့ ရှိနေတယ်လို့ ထိုင်းပြည်သူ့ကျန်းမာရေးဝန်ကြီးဌာနက ပြောပါတယ်။

ရောဂါထိန်းချုပ်ရေးဦးစီးဌာန ပြောရေးဆိုခွင့်ရှိသူ သနာကွန် ဝမ်ဘွန်ကောင်ချနာက ခုလို ကာကွယ်ဆေး ဝယ်ယူမယ့် အစီအစဉ်မှာ ထိုင်း၊ ဟန်ဂေရီနိုင်ငံတွေနဲ့ AstraZeneca ကာ ကွယ်ဆေး ကုမ္ပဏီ ၃ ခုတို့ကြား သယ်ယူပို့ဆောင်ရေး၊ ပိုင်ဆိုင်မှုနဲ့ အငြင်းပွားမှုဆိုင်ရာ ဥပဒေတွေနဲ့ သွယ်ဝိုက်ခွန်တွေ စတဲ့ သဘောတူညီချက်တွေ ပါဝင်တယ်လို့ ဆိုပါတယ်။

ခုလို ကာကွယ်ဆေးဝယ်ယူမှုဟာ အစိုးရရဲ့ ကိုဗစ်-၁၉ ကာကွယ်ဆေး ၁၂၆ ဒသမ ၂ သန်း ဝယ်ယူနိုင်ရေးအစီအစဉ်ရဲ့ တစိတ်တပိုင်းဖြစ်ပြီး ထိုင်းအစိုးရက အခုလာမယ့် နှစ်ကုန် ဒီဇင်ဘာလမှာ လူဦးရေအနည်းဆုံး ၇၀ ရာခိုင်နှုန်းကို ကာကွယ်ဆေးထိုးနှံပေးနိုင်ဖို့ ရည်ရွယ်တယ်လို့ ဆိုပါတယ်။

အိုက်စ်လန်နဲ့ ဂျာမနီနိုင်ငံတွေက လှူဒါန်းမယ့် ကာကွယ်ဆေးလှူဒါန်းမှု သဘောတူညီချက်ကိုတော့ ထိုင်းပြည်သူ့ကျန်းမာရေးဝန်ကြီး အနုတင်ချန်းဗီရာကူလ်က လက်မှတ်ရေးထိုးခဲ့ပြီး အခုလထဲမှာ ရောက်ရှိနိုင်မယ်လို့ မျှော်မှန်းထားပါတယ်။