ကာတာနိုင်ငံမှာ ကျင်းမယ့် ၂၀၂၂ ကမ္ဘာ့ဖလားက ကစားသမားဘဝရဲ့ နောက်ဆုံးကမ္ဘာ့ဖလားပြိုင်ပွဲ ဖြစ်နိုင်တယ်လို့ ဘရာဇီးတိုက်စစ်မှူး နေမာက ဝန်ခံပြောလိုက်ပါတယ်။ 

လက်ရှိအချိန်မှာ အသက် ၂၉ နှစ်ရှိပြီဖြစ်တဲ့ နေမာဟာ ၂၀၂၆ ကမ္ဘာ့ဖလားပြိုင်ပွဲကျင်းပချိန်မှာ အသက် ၃၄ နှစ် ရှိနေမှာ ဖြစ်ပါတယ်။ 

၂၀၂၆ ကမ္ဘာ့ဖလားမှာ ဘောလုံးကစားဖို့ စိတ်ဓာတ်ခွန်အားရှိနေမလားဆိုတာ မသိရှိနိုင်တာကြောင့် လာမယ့် ၂၀၂၂ ကမ္ဘာ့ဖလားက နောက်ဆုံးပြိုင်ပွဲဖြစ်နိုင်တယ်လို့ နေမာက သူ့ရဲ့ မှတ်တမ်းရုပ်ရှင်အသစ်တစ်ခုမှာ ထည့်သွင်းပြောပြခဲ့တာပါ။ 

၂၀၂၆ ကမ္ဘာ့ဖလားကို ၁၉၉၄ ခုနှစ်နောက်ပိုင်း မြောက်အမေရိကမှာ ပထမဆုံးအကြိမ် ကျင်းပမှာဖြစ်ပြီး အမေရိကန်၊ ကနေဒါနဲ့ မက္ကဆီကို တို့က ပူးတွဲကျင်းပမှာဖြစ်ပါတယ်။ 

နေမာဟာ ဘရာဇီးက အိမ်ရှင်အဖြစ် ကျင်းပခဲ့တဲ့ ၂၀၁၄  နဲ့ ၂၀၁၈ ရုရှား ကမ္ဘာ့ဖလားတွေမှာ ဝင်ရောက်ယှဉ်ပြိုင်ခဲ့ပြီး ၂၀၂၂ ကမ္ဘာ့ဖလားက သူ့ရဲ့ နောက်ဆုံးကမ္ဘာ့ဖလားပြိုင်ပွဲ ဖြစ်လာဖို့ ရှိနေပါတယ်။