စပိန်နိုင်ငံ ပယ်လ်မာဒေ မော်ယော်ကာ လေဆိပ်ပြေးလမ်းပေါ်ကနေ နိုဝင်ဘာ ၅ ရက်ညက ထွက်ပြေးတဲ့ ခရီးသည်တစုထဲက လူ ၁၂ ယောက်ကို ရဲတွေက ဖမ်းခဲ့ပြီး နောက်ထပ် ၁၂ ယောက်ကို ရှာနေပါတယ်။

ကာဆာဘလန်ကာမြို့ကနေ အစ္စတန်ဘူလ်မြို့ကို ပျံသန်းတဲ့ အဲရ် အာရေးဗီးယား မာရော့ခ် လေကြောင်းခရီးစဉ်ဟာ နေမကောင်းတဲ့ ခရီးသည်တယောက်အတွက် ပယ်လ်မာဒေ မော်ယော်ကာ လေဆိပ်မှာ အရေးပေါ် ဆင်းသက်ခဲ့တာလို့ စပိန်အရပ်ဘက်အစောင့်တပ်က ပြောပါတယ်။

ည ၈ နာရီခွဲလောက်မှာ လေယာဉ်တံခါး ပွင့်ချိန်မှာတော့ ခရီးသည် ၂၁ ယောက်ပါတဲ့ အုပ်စုက လေယာဉ်ထဲကနေ ထွက်ပြေးခဲ့တယ်လို့ ဒေသခံ အစိုးရက စနေနေ့မှာ ပြောပါတယ်။

ဒီဖြစ်ရပ်ဟာ မကြုံစဖူး ဖြစ်ရပ်လို့ ဒေသန္တရအစိုးရ ပြောခွင့်ရ အိုင်နာ ကယ်လ်ဗိုက သတင်းထောက်တွေကို ပြောပါတယ်။

နေမကောင်းတဲ့ ခရီးသည် အပါအဝင် လူ ၁၂ ယောက်ကို ပြန်ဖမ်းမိခဲ့ပြီး နေမကောင်းသူကို အဖော်တယောက်နဲ့အတူ ဆေးရုံတင်ထားပါတယ်။

“အဖော်ပါသူက ဆေးရုံကနေ ထွက်ပြေးဖို့ ကြိုးစားခဲ့လို့ သူ့ကို ထပ်ဖမ်းခဲ့ရတာပါ။တခြားခရီးသည် တယောက်ကိုလည်း ရန်လိုတဲ့ အပြုအမူ အတွက် လေယာဉ်ပေါ်မှာ ဖမ်းဆီးခဲ့ပါတယ်။ ခရီးသည်တွေ ဘာကြောင့် ထွက်ပြေးတာလဲ၊ ပူးပေါင်းကြံစည်မှုလား ဒါမှမဟုတ် သီးခြား ဖြစ်ရပ်တွေလား ဆိုတာကို ဖော်ထုတ်ဖို့ ရဲတွေက ကြိုးစားနေတယ်”လို့ ကယ်လ်ဗိုက ပြောပါတယ်။

ဒီလူတွေဟာ ပင်လယ်ပြင်ကနေ ရောက်လာတာမဟုတ်ပေမယ့် တရားမဝင် နည်းလမ်းနဲ့ လာတာ ဖြစ်လို့ သူတို့ကို မူရင်းနိုင်ငံ ပြန်ပို့မယ်လို့လည်း သူက ဆက်ပြောပါတယ်။

ဒီလုပ်ရပ်ဟာ စပိန်နိုင်ငံအတွင်း တရားဝင် ဝင်ရောက်ဖို့ ကြိုးစားမှုအဖြစ် စပိန်မီဒီယာ အတော်များများက အရိပ်အမြွက်ဖော်ပြကြပေမယ့် အတည်ပြုတာတော့ မရှိပါဘူး။ 

ဒီဖြစ်ရပ်ကြောင့် လေဆိပ်ကိုလည်း ၃ နာရီကျော်ကြာ ပိတ်ထားခဲ့ရပြီး ဆင်းသက်မယ့် လေယာဉ်တွေကို တခြားလေဆိပ်တွေဆီ လမ်းကြောင်း လွှဲပေးခဲ့ရပါတယ်။