မွန်ပြည်နယ်၊ ကျိုက်ထိုမြို့မှာ ကျိုက်ထို လူမှုကူညီရေးအသင်း ဥက္ကဋ္ဌ ဦးစိုးသီဟ အပါအဝင် ဒေသခံ ၁၀ ယောက် ထက်မနည်း ဖမ်းဆီခံလိုက်ရတယ်လို့ လူမှုကူညီရေးအသင်းတာဝန်ရှိသူနဲ့ ဒေသခံတွေက ပြောပါတယ်။

ဒေသခံ ပြည်သူ့ကာကွယ်ရေးတပ်ဖွဲ့ PDF တွေနဲ့ ဆက်သွယ်တာ၊ ထောက်ပံ့ကူညီတာတွေ လုပ်ဆောင်နေ တယ်ဆိုတဲ့ စွပ်စွဲချက်တွေနဲ့  နိုဝင်ဘာ ၁၄ ရက်နေ့မှာ ကျိုက်ထိုမြို့ပေါ်က ဒေသခံ လူငယ် ၇ ဦး ထက်မနည်း ဖမ်ဆီးခံလိုက်ရတာ ဖြစ်ပါတယ်။ 

ဒါ့အပြင် နိုဝင်ဘာ ၁၅ ရက်နေ့မှာတော့ ကျိုက်ထိုလူမှုကူညီရေးအသင်း ဥက္ကဋ္ဌ ဦးစိုးသီဟ အပါအဝင် လူမှုကယ်ဆယ်ရေးအဖွဲ့ဝင် ၄ ဦး ဖမ်းဆီးခဲ့တာ ဖြစ်ပါတယ်။

ကျိုက်ထိုလူမှုကူညီရေးအသင်း ဥက္ကဋ္ဌ ဦးစိုးသီဟကိုတော့ ရဟန်းဝတ်နေတဲ့ကြားက လူဝတ်လဲပြီး ဖမ်းဆီးသွားခဲ့တာလို့ ဒေသခံ တစ်ဦးက ပြောပါတယ်။

ကျိုက်ထိုမြို့နယ်မှာတော့ အခုရက်ပိုင်းအတွင်း စစ်ကောင်စီတပ်ဖွဲ့ဝင်တွေက  အန်အယ်လ်ဒီ ပါတီ ထောက်ခံသူတွေနဲ့ ဒေသခံပြည်သူတွေကို နေအိမ်အတွင်း ဝင်ရောက် ဖမ်းဆီးတာနဲ့ ပိတ်ဆို့ရှာဖွေ စစ်ဆေးတာတွေ ဆက်တိုက်လုပ်ဆောင်နေပါတယ်။