မက္ကဆီကိုနိုင်ငံက နယ်မြေအများအပြားမှာ  ကလေးတွေ၊ ဆယ်ကျော်သက်တွေနဲ့ အမျိုးသမီးတွေ ပျောက်ဆုံးမှု သိသိသာသာ တိုးလာတယ်လို့ ကုလသမဂ္ဂရဲ့ ပျောက်ဆုံးမှု တိုက်ဖျက်ရေးကော်မတီရဲ့ တွေ့ရှိချက်အရ သိရပါတယ်။ 

ကပ်ရောဂါကာလအတွင်း ပျောက်ဆုံးမှု သိသိသာသာ တိုးလာခဲ့တာလို့ ကုလသမဂ္ဂ ကော်မတီအဖွဲ့ဝင် ကာမင်ဗီလာက နိုဝင်ဘာ ၂၆ ရက်နေ့မှာ ထုတ်ဖော်ပြောကြားခဲ့ပါတယ်။

တရားဝင်အချက်အလက်တွေအရ မက္ကဆီကိုမှာ လက်ရှိပျောက်ဆုံးနေသူ ၉၅,၁၂၁ ဦး ရှိပါတယ်။ ဒီလို အတင်းအဓမ္မ ပျောက်ဆုံးရမှုတွေ ဘယ်လောက်များများ ရှိနေတယ်ဆိုတာ ရှင်းရှင်းလင်းလင်း မသိရသေးကြောင်း၊ ဒီအမှုတွေဟာ ပြည်နယ် အာဏာပိုင်တွေ ဒါမှမဟုတ် တရားဝင် ပံ့ပိုးကူညီမှုနဲ့ လုပ်ဆောင်တဲ့အဖွဲ့တွေက ကျူးလွန်ခဲ့တာလို့ ဆိုပါတယ်။

ပျောက်ဆုံးမှု တိုက်ဖျက်ရေးကော်မတီဟာ မက္ကဆီကိုနိုင်ငံ ပြည်နယ် ၁၃ ခုက သေဆုံးသူတွေရဲ့ မိသားစုတွေနဲ့ အစိုးရအရာရှိတွေကို ဆယ်ရက်ကြာ တွေ့ဆုံခဲ့တာလည်း ဖြစ်ပါတယ်။

မက္ကဆီကိုအစိုးရကလည်း အတင်းအဓမ္မ ပျောက်ဆုံးရမှုတွေကို တိုက်ဖျက်ရာမှာ သိသာထင်ရှားတဲ့ စိန်ခေါ်မှုတွေ ရှိနေကြောင်း ပြောကြားခဲ့ပြီး အမှုအခင်းတွေကို စုံစမ်းစစ်ဆေးဖို့နဲ့ ပျောက်ဆုံးသူတွေကို ရှာဖွေဖို့ ကော်မတီနဲ့ပူးပေါင်းဆောင်ရွက်သွားမယ်လို့ ကတိပြုခဲ့ပါတယ်။

ပျောက်ဆုံမှု အရေအတွက် အများဆုံးနိုင်ငံက အီရတ်ဖြစ်ပြီး မက္ကဆီကိုက လက်ရှိ ဒုတိယနေရာမှာ ရပ်တည်နေပါတယ်။