မော်ရိုကိုနဲ့ အစ္စရေးအစိုးရတို့ဟာ မော်ရိုကိုနိုင်ငံမြို့တော် ရာဘတ်မှာ ကာကွယ်ရေးဆိုင်ရာ နားလည်မှု စာချွန်လွှာကို နိုဝင်ဘာ ၂၄ ရက်က လက်မှတ်ရေးထိုးခဲ့ပြီး စစ်ဘက် အရောင်းအဝယ်နဲ့ ပူးပေါင်းဆောင်ရွက်ရေးအတွက် လမ်းဖွင့်လိုက်ပါတယ်။

အစ္စရေးကာကွယ်ရေးဝန်ကြီး ဘန်နီဂန့်ဇ်ရဲ့ အလည်အပတ်ခရီးစဉ်အတွင်း လက်မှတ်ထိုးတာ ဖြစ်ပြီး မော်ရိုကို ကာကွယ်ရေးဆိုင်ရာစီမံအုပ်ချုပ်ရေးဝန်ကြီး အဗ်ဒယ်လာတစ်ဖ် လောင်ဒီယီနဲ့ တခြားအရာရှိတွေနဲ့ ဆွေးနွေးဖို့လည်း စီစဉ်ထားပါတယ်။

အဆိုပါ နားလည်မှု စာချွန်လွှာမှာတော့  ကာကွယ်ရေးဆိုင်ရာ သဘောတူညီချက်တွေကို အသေးစိတ် မသတ်မှတ်ရသေးပါဘူး။

ဂန့်ဇ်ကတော့ သူဟာ မော်ရိုကို ကို တရားဝင် သွားရောက် လည်ပတ်မယ့် ပထမဆုံး အစ္စရေး ကာကွယ်ရေးဝန်ကြီးဖြစ်တယ်လို့ ရာဘတ်မြို့ဆီ မသွားခင် သတင်းထောက်တွေကို  ပြောခဲ့ပါတယ်။ 

အစ္စရေးနဲ့ မော်ရိုကို နှစ်နိုင်ငံဟာ အရင်နှစ်က သံတမန် ဆက်ဆံရေး အဆင့်မြှင့်ခဲ့တာဖြစ်ပြီး အခုခရီးစဉ်ဟာ ဆယ်စု နှစ်ချီ တိတ်တဆိတ် ဆက်ဆံရေးတွေကို သွယ်ဝိုက် အသိအမှတ်ပြုလိုက်တာလို့ မီဒီယာတွေက သုံးသပ် ပါတယ်။