ကိုဗစ်-၁၉ မျိုးကွဲသစ် Omicron ပိုးကူးစက်မှုဖြစ်ပွားနေတဲ့  အာဖရိကတိုက်  ၈ နိုင်ငံက ဝင်ရောက်လာတဲ့ နိုင်ငံခြားသားတွေအနေနဲ့  RT-PCR စစ်ဆေးကြဖို့  ထိုင်းနိုင်ငံ ကိုဗစ်-၁၉ ထိန်းချုပ်ကွပ်ကဲစီမံရေးဗဟိုကော်မတီက ဒီဇင်ဘာ ၁ ရက်  ဒီကနေ့မှာ ထုတ်ပြန်ပြောကြားပါတယ်။ 

အာဖရိကတိုက် ၈ နိုင်ငံကနေ ထိုင်းနိုင်ငံထဲကို ပြီးခဲ့တဲ့ နိုဝင်ဘာ ၁၅ မှ ၂၇ ရက်တွေအတွင်း ဝင်ရောက်လာတဲ့ နိုင်ငံခြားသားပေါင်း ၂၅၅ ဦးရှိကြောင်း ၊ အဲဒီထဲက ၃ ဦးပြန်သွားပြီး ကျန်တဲ့  ၂၅၂ ဦးအနေနဲ့ နီးစပ်ရာ အစိုးရဆေးရုံတွေမှာ RT-PCR စနစ်နဲ့ ကိုဗစ်-၁၉ ထပ်မံစစ်ဆေးကြဖို့ ထိုင်းနိုင်ငံ ကိုဗစ်-၁၉ ထိန်းချုပ်ကွပ်ကဲစီမံရေးဗဟိုကော်မတီ ပြောရေးဆိုခွင့်ရှိသူ ဒေါက်တာထဝီးဆင် ဝိစနုယိုးထင်းက ဒီကနေ့မနက်  နေ့စဉ်သတင်းစာရှင်းပွဲမှာ ထည့်သွင်း ပြောကြားပါတယ်။ 

အဆိုပါ နိုင်ငံခြားခရီးသွားဧည့်သည် ၂၅၂ ဦးအနက် ၁၁ ဦးကိုတော့ အဆက်အသွယ်ရပြီဖြစ်ကြောင်း ၊ ကျန်သူတွေအနေနဲ့ Sand Box ( အထူးအလည်အပတ်ထွက်လာတဲ့အုပ်စု ) နဲ့လာတယ်ဆိုရင် ၁၄ ရက် ကွာရန်တင်းဝင်ဖို့ ၊ ပြင်ပရောက်နေသူတွေအနေနဲ့ ၁၄ ရက်မိမိကိုယ်သတိထားစောင့်ကြည့်ပြီး ခရီးသွားလာမှုလျှော့ချဖို့ လည်းမှာကြားပါတယ်။ 

နိုင်ငံခြားသားတွေအနေနဲ့ ထိုင်းနိုင်ငံ ကိုဗစ်-၁၉ ကာကွယ်ရေးစည်းကမ်းချက်တွေ လိုက်နာကျင့်သုံးဖို့ တိုက်တွန်းကြောင်း ၊ မလိုက်နာသူတွေအနေနဲ့ ထိုင်းနိုင်ငံကူးစက်ရောဂါ ကာကွယ်ရေးဥပဒေနဲ့ ညှိစွန်းပြီးအရေးယူခံရမယ်လို့ ဆိုပါတယ်။  

အဆိုပါ ၈ နိုင်ငံမှာ ဘော့စ်ဆွာနာ၊ အဲ့စ်ဝါတီးနီ (ယခင်ဆွာဇီလန်)၊ လီဆိုသို၊ မာလာဝီ၊ မိုဇမ်ဘစ်၊ နမီးဘီးယား၊ တောင်အာဖရိကနဲ့ ဇင်ဘာဘွေနိုင်င စတဲ့နိုင်ငံတွေဖြစ်ပြီး ထိုင်းက ပြီးခဲ့တဲ့ရက်ပိုင်းကစ ပြည်ဝင်ခွင့်ပိတ်ပင်ထားတာပါ။ 

နိုဝင်ဘာ ၂၈ ရက်နေ့ကစ ထိုင်းထဲဝင်ရောက်လာတဲ့ အာဖရိကတိုက်သားပေါင်း ၇၈၃ ဦးရှိပြီး သူတို့ဟာလည်း ၁၄ ရက် ကွာရန်တင်းဝင်ကာ RT-PCR  သုံးကြိမ် စစ်ဆေးရမယ်လို့ ဒေါက်တာထဝီးဆင်က ပြောပါတယ်။