ပဲခူးတိုင်း၊ နတ်တလင်းမြို့နယ်၊ အမျိုးသားဒီမိုကရေစီအဖွဲ့ချုပ်၊ မြို့နယ်အလုပ်အမှုတောင် ဦးအောင်ဆန်းလင်းကို စစ်ကောင်စီတရားရုံးက ရှေ့နေမပါဘဲ ရုံးချိန်း ၂ ကြိမ်သာစစ်ဆေးပြီး ထောင် ၃ နှစ်ချမှတ်ခဲ့တယ်လို့ သိရပါတယ်။

နီးစပ်သူတဦးက “ဦးအောင်ဆန်းလင်းကို စစ်ကောင်စီကမတရားဖမ်းပြီး ပေါင်းတည်ထောင်ထဲမှာ ချုပ်ထားတာ။ အခုအမိန့်ချတာက ထောင်တရားရုံးမှာ အမှုကို ၂ ကြိမ်ပဲစစ်ရသေးတယ်။ ရှေ့နေပါဝါကို မတင်ရသေးဘူး။ အခွင့်အရေးမှန်သမျှ အကုန်ဆုံးရှုံးတယ်” လို့ ပြောပါတယ်။

ဦးအောင်ဆန်းလင်းကို စစ်ကောင်စီက ရာဇသတ်ကြီးဥပဒေပုဒ်မ ၅၀၅ (က) နဲ့ ပြီးခဲ့တဲ့လအနည်းငယ်က ဖမ်းဆီးအမှုဖွင့်ကာ ပေါင်းတည်အကျဉ်းထောင်မှာ ချုပ်နှောင်ထားပြီးနောက် ထောင်တွင်းတရားရုံးကနေ တဖက်သတ်အမိန့်ချမှတ်လိုက်တာလို့ ဆွေမျိုးနီးစပ်သူတွေဆီက သိရပါတယ်။

စစ်ကောင်စီက နိုင်ငံတော်အာဏာကို မတရားသိမ်းယူခဲ့တဲ့ ၂၀၂၁ ခုနှစ် ဖေဖော်ဝါရီလ ၁ ရက်နေ့မှကနေ နိုဝင်ဘာ ၃၀ ရက်နေ့အထိ အမျိုးသားဒီမိုကရေစီအဖွဲ့ချုပ်ပါတီ ခေါင်းဆောင်တွေအပါအဝင် ပါတီဝင် ၅၇၉ ဦး ဖမ်းဆီးထိန်းသိမ်းခံထားရပြီး ပြန်လည်လွတ်မြောက်လာသူ ၁၂၈ ဦး၊ စစ်ကြောရေးမှာသေဆုံးသူ ၈ ဦး၊ ၄၃၂ ဦးကတော့ ဖမ်းဆီးထိန်းသိမ်းခံထားရဆဲဖြစ်တယ်လို့ NLD ပါတီက သတင်းထုတ်ပြန်ထားပါတယ်။

ပဲခူးတိုင်းအနောက်ခြမ်း၊ မိုးညိုမြို့နယ်၊ အမျိုးသားဒီမိုကရေစီအဖွဲ့ချုပ် ပြည်သူ့လွှတ်တော်ကိုယ်စားလှယ်အမတ်ဟောင်း ဦးကျော်မျိုးမင်းဟာလည်း ဖမ်းဆီးခံထားရသလို ၂၀၂၀ အထွေထွေရွေးကောက်ပွဲမှာအနိုင်ရရှိခဲတဲ့ အမျိုးသားဒီမိုကရေစီအဖွဲ့ချုပ်၊ ပြည်သူလွှတ်တော်ကိုယ်စားလှယ် ဦးဝင်းနိုင်လည်း ရာဇသတ်ကြီးဥပဒေပုဒ်မ ၅၀၅(က) နဲ့ တရားစွဲခံရပြီး ထောင် ၃ နှစ် ချမှတ်ခံထားရတယ်လို့ ဒေသခံတွေဆီက သိရပါတယ်။