ယူကရိန်းနယ်စပ်အနီးမှာ ရုရှားတပ် ထောင်ပေါင်းများစွာ တပ်ချထားပြီး၊ စစ်ပြင်ဆင်မှုတွေ အကြီးအကျယ် လုပ်နေပြီး နှစ်နိုင်ငံကြား စစ်ဖြစ်တော့မယ့်  အလားအလား ရှိနေတယ်လို့ ယူကရိန်းသမ္မတက ပြောပါတယ်။ 

သမ္မတ ဇီလန်စကီးက “ရုရှားကျူးကျော်သူတွေရဲ့ရန်ကနေ နိုင်ငံအချုပ်အခြာနဲ့ လွတ်လပ်မှုကို ကာကွယ်ဖို့ ယူကရန်းတပ်သားတွေဟာ အရေးကြီးဆုံးမစ်ရှင်ကို အစွမ်းကုန် ထမ်းရွက်ကြလိမ့်မယ်” လို့ ပြောပါတယ်။

ရုရှားဘက်ကတော့ ယူကရိန်းကို တိုက်ခိုက်တော့မယ်ဆိုတာဟာ မှားယွင်းစွာပုံဖော် ချဲ့ကားပြောဆိုမှုတွေသာ ဖြစ်တယ်လို့ ပြောပါတယ်။ 

သမ္မတ ဇီလန်စကီးဟာ ဒန်းယက်စ်ဒေသ ရှေ့တန်းစစ်မျက်နှာကိုသွားရောက်ပြီး ယူကရိန်းစစ်သား တွေကို အားပေးခဲ့ပါတယ်။ 

ဒန်းယက်စ်မှာ ၂၀၁၄ ခုနှစ်က ယူကရိန်းတပ်နဲ့ ရုရှားတပ်တွေ ပဋိပက္ခဖြစ်ခဲ့ပြီး လူ ၁၄၀၀၀ ကျော် သေဆုံးခဲ့ပါတယ်။

ဇီလန်စကီးက ယူကရိန်း အရှေ့မြောက်ဘက် ခါကိမြို့ရှိ လက်နက်၊ တင့်ကားနဲ့ စစ်ယဉ်တွေ ထုတ်လုပ်တဲ့ စက်ရုံတွေကိုလည်း သွားခဲ့ပါတယ်။ 

နေတိုးမဟာမိတ်အဖွဲ့အကူအညီနဲ့ စစ်လက်နက်တွေ တပ်ဆင်နိုင်တာကို ဂုဏ်ယူနေပါတယ်။ 

ယူကရိန်းဟာ တင့်ကားဖျက်ဒုံးယာဉ်တွေကို အမေရိကန်နဲ့ အခြားခေတ်မီ ဒရုန်းတွေကိုတော့ တူရကီဆီက ရရှိထားပြီး တောင်ဘက်ကမ်းရိုးတမ်းတလျှောက်မှာလည်း ဗြိတိန်အကူအညီနဲ့ ရေတပ်သစ်တည်ဆောက်နေပါတယ်။

ယူကရိန်းနိုင်ငံ မြို့ကြီးတွေမှာလည်း ၁၉၉၁ ဆိုဗီယက်ယူနီယံအောက်က လွတ်လပ်ရေးရ ပြီးနောက် လွတ်လပ်သောစစ်တပ် တည်ထောင်ခွင့်ရရှိမှု နှစ် ၃၀ ပြည့်အထိမ်းအမှတ်ကို ကျင်းပနေပါတယ်။