ယူကရိန်းနိုင်ငံအရှေ့ပိုင်း ပဋိပက္ခ လူမျိုးတုံးသတ်ဖြတ်မှုဟု ရုရှားသမ္မတပြော

ယူကရိန်းနိုင်ငံအရှေ့ပိုင်း ဒွန်ဘတ်စ်ဒေသတွင်းက ပဋိပက္ခဟာ လူမျိုးတုံး သတ်ဖြတ်မှု ဖြစ်ပုံရတယ်လို့ ရုရှားသမ္မတ ဗလာဒီမီယာ ပူတင်က ဒီဇင်ဘာ ၉ ရက်မှာ ရုရှားလူ့အခွင့်အရေး ကောင်စီနဲ့ အစည်းအဝေးအတွင်း ပြောလိုက်ပါတယ်။
အဲဒီနေ့မှာပဲ အမေရိကန် သမ္မတ ဂျိုးဘိုင်ဒန်နဲ့ ယူကရိန်း သမ္မတ ဗိုလိုဒီမြာ ဇေလန်စကီတို့ဟာ မြောက်အတ္တလန္တိတ် စစ်ရေးမဟာမိတ်အဖွဲ့ နေတိုးကို ယူကရိန်းက ပူးပေါင်းရေး ယူကရိန်းအစိုးရရဲ့ ကြိုးပမ်းချက်ကို ဆွေးနွေးခဲ့ကြပါတယ်။
ပူတင်ကတော့ ရုရှားကိုအကြောက်လွန်တဲ့ စိတ်ရောဂါဟာ လူမျိုးတုံး သတ်ဖြတ်မှုဆီကို ဦးတည်တဲ့ ပထမခြေလှမ်းပဲလို့ ပြောပါတယ်။
ရုရှားဟာ အကြီးစား ထိုးစစ်အတွက် ပြင်ဆင်တဲ့အနေနဲ့ ထောင်သောင်းချီနေတဲ့ စစ်သည်တွေကို နယ်စပ်မှာ ချထားတယ်လို့ ယူကရိန်းအစိုးရက စွပ်စွဲပါတယ်။
ဒွန်ဘတ်စ်ဒေသအတွင်း ပဋိပက္ခကနေ ယူကရိန်းနဲ့ ရုရှား အိမ်နီးချင်း ၂ နိုင်ငံအကြား စစ်ပွဲတရပ် ပွင့်ပွင့်လင်းလင်း ပေါ်လာမှာကိုလည်း ပိုစိုးရိမ်နေကြပါတယ်။
ရုရှားကတော့ ဘယ်တိုက်ခိုက်မှုကိုမဆို စီစဉ်နေတာ မဟုတ်ဘူးလို့ ငြင်းပါတယ်။
ယူကရိန်းနဲ့ အမေရိကန်တို့က မတည်ငြိမ်အောင် လုပ်နေတာလို့ စွပ်စွဲပြီး နေတိုးတပ်တွေ ဥရောပ အရှေ့ပိုင်းကို တိုးချဲ့လာတာမလုပ်ဖို့ လုံခြုံရေး အာမခံချက် ပေးဖို့ကိုလည်း တောင်းဆို လိုက်ပါတယ်။
ယူကရိန်းကတော့ သူပါဝင်ပတ်သက်မှုမရှိတဲ့ အနာဂတ်အတွက် အာမခံချက်ရရေး ကြိုးစားနေပြီး တရားမဝင်တဲ့ အာမခံချက်တွေကိုလည်း ပယ်ချခဲ့ပါတယ်။
ရုရှားက ခရိုင်းမီးယားကို ကျူးကျော်သိမ်းပိုက်ပြီး ရုရှားအစိုးရက ကျောထောက်နောက်ခံ ပေးထားတဲ့ တပ်တွေက ယူကရိန်းအရှေ့ပိုင်းကို သိမ်းပိုက်ခဲ့ပြီးတဲ့နောက် ယူကရိန်းနဲ့ရုရှား ဆက်ဆံရေး ၂၀၁၄ မှာ ပျက်ပြယ်ခဲ့ပါတယ်။
အဲဒီအချိန်ကစပြီး ခုထိ တိုက်ပွဲတွေမှာ လူအယောက် ၁၄၀၀၀ ကျော် သေဆုံးခဲ့တယ်လို့ ယူကရိန်းအစိုးရက ပြောထားပါတယ်။