ကရင်ပြည်နယ် မြဝတီမြို့တောင်ဘက် လေးကေ့ကော်မြို့သစ်တဝိုက်မှာ ဒီနေ့ညနေ ၃ နာရီလောက်ကစပြီး စစ်ကောင်စီတပ်နဲ့ KNLA တပ်တို့ တိုက်ပွဲတွေ ဆက်လက်ဖြစ်ပွားနေတယ်လို့ ဒေသခံတွေက ပြောပါတယ်။

ညနေ ၆ နာရီကျော်လောက်ထိ နှစ်ဖက် တိုက်ပွဲပြင်းထန်နေတာကြောင့် ပြည်သူ ၂၀၀ ကျော် ထွက်ပြေးနေရတယ်လို့ စစ်ရှောင်တစ်ဦးက တိမ်းရှောင်ထွက်ပြေးရင်း အခုလို ပြောပါတယ်။

“ကျနော်တို့ ရှောင်နေတဲ့နားအထိ တိုက်ပွဲက ရောက်လာပြီ။ အကုန်လုံး လက်နက်ကြီး၊ လက်နက်ငယ်တွေနဲ့ ပစ်ခတ်နေကြတာ။ သေနတ်သံတွေ ဆူညံနေတာပဲ။ အခုထွက်ပြေးနေရတာက ခန့်မှန်းခြေ လူ ၂၀၀ ကျော်လောက်ရှိမယ်၊ အကုန် အသက်လုထွက်ပြေးနေကြရတာ။”

ညနေ ၃ နာရီကျော်လောက်မှာ စစ်ကောင်စီတပ်က ၁၂၀ မမ လက်နက်ကြီးနဲ့ ပစ်ခတ်တာကြောင့် မြဝတီမြို့နယ် မဲထော်သလေးရွာက နေအိမ် ၂ လုံးမီးလောင်ခဲ့ပြီး ၁ လုံး ပျက်စီးသွားတယ်လို့ အမည်မဖော်လိုတဲ့ KNLA တပ်ဖွဲ့ဝင်တစ်ဦးက ပြောပါတယ်။

နေအိမ်တွေ မီးလောင်ခဲ့ပေမယ့် ထိခိုက်ဒဏ်ရာရသူတော့ မရှိဘူးလို့ ဆိုပါတယ်။

ကရင်ပြည်နယ် မြဝတီခရိုင် လေးကေ့ကော်မြို့သစ်နဲ့ အနီးဝန်းကျင်တဝိုက်မှာ ဒီဇင်ဘာ ၁၅ ရက်နေ့ကစပြီး ဒီဇင်ဘာ ၁၈ ရက်အထိ စစ်ကောင်စီတပ်နဲ့ KNLA တပ်တွေ နှစ်ဘက် တိုက်ပွဲတွေကြောင့် ဒေသခံ ၄၀၀၀ လောက် ထိုင်းဘက်ခြမ်းကို ထွက်ပြေးတိမ်းရှောင်နေရပြီး ဒီနေ့ညနေလည်း ထပ်မံ တိုက်ပွဲဖြစ်ပွားနေတာပါ။