နေပြည်တော်မှာ ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ်ရုံး ဆက်လက်ထားရှိဖို့ အရေးကြီးကြောင်းနဲ့ အထူးကိုယ်စားလှယ်သစ် နိုလင်း‌ဟေဇာအနေနဲ့  မြန်မာနိုင်ငံက သက်ဆိုင်သူ အားလုံးနဲ့ လက်တွဲဆောင်ရွက်မှုတွေ ခိုင်မာအားကောင်းလာဖို့ မျှော်လင့်နေကြောင်း ကုလအတွင်းရေးမှူးချုပ်ရဲ့ လက်ထောက် ပြောခွင့်ရ ဖာဟန်ဟတ် ကပြောပါတယ်။ 

နေပြည်တော်မှာရှိတဲ့   မြန်မာနိုင်ငံဆိုင်ရာ အထူးကိုယ်စားလှယ်ဟောင်း ခရစ္စတင်းဘာဂီနာရဲ့ရုံးကို ဆက်ဖွင့်ခွင့်မပြုဘဲပိတ်လိုက်ကြောင်း မြန်မာစစ်ကောင်စီက ဒီဇင်ဘာ ၂၀ ရက်မှာ ကြေညာလိုက်ပြီးတဲ့နောက် ကုလအတွင်းရေးမှူးချုပ်ရုံးရဲ့ မနေ့က သတင်းစာရှင်းလင်းပွဲမှာ တုံ့ပြန်ပြောဆိုလိုက်တာဖြစ်ပါတယ်။

ကုလသမဂ္ဂအထူးကိုယ်စားလှယ်ရုံးကိုတော့ မြန်မာပြည်သူတွေကို အားပေးကူညီဖို့၊ ငြိမ်းချမ်းရေး မြှင့်တင်ဖို့ ရည်ရွယ်ပြီး  အန်အယ်လ်စီအစိုးလက်ထက် ၂၀၁၈ ခုနှစ်မှာ မြန်မာအစိုးရနဲ့ ကုလသမဂ္ဂအကြား သဘောတူညီချက်အရ ဖွင့်လှစ်ခဲ့တာဖြစ်ပါတယ်။

အထူးကိုယ်စားလှယ်ဟောင်း မစ္စခရစ္စတင်းဘာဂီနာ နေရာမှာ အောက်တိုဘာ ၂၅ ရက်မှာပဲ  စင်္ကာပူနိုင်ငံသူ ဝါရင့်သံတမန် အထူးကိုယ်စားလှယ် နိုလင်း‌ဟေဇာကို ကုလသမဂ္ဂ အတွင်းရေးမှူးချုပ် ဂူတာရပ်စ်က အစားထိုး ခန့်အပ်ထားပါတယ်။ 

အထူးကိုယ်စားလှယ်သစ်အနေနဲ့ မြန်မာနိုင်ငံက လက်ရှိအခြေအနေကို ကိုယ်တိုင်ကိုယ်ကျ နားလည်သဘောပေါက်နိုင်ဖို့၊ လတ်တလော ရင်ဆိုင်နေရတဲ့ အကျပ်အတည်းကို နိုင်ငံတကာရဲ့ ပံ့ပိုးမှုတွေနဲ့ မြန်မာနိုင်ငံက ဦးဆောင်ဖြေရှင်းနိုင်အောင် သက်ဆိုင်သူတွေ အားလုံးရဲ့ သဘောထား အမြင်တွေကို သေချာ နားထောင်ခွင့်ရဖို့ မျှော်လင့်ထားကြောင်းလည်း အတွင်းရေးမှူးချုပ်ရုံးက ဆိုထားပါတယ်။

ဒါပေမဲ့ အထူးကိုယ်စားလှယ်သစ်  နိုလင်း‌ဟေဇာဟာ မြန်မာနိုင်ငံကို တကြိမ်မှ သွားရောက်ခွင့် မရသေးပါဘူး။