သြစတြေးလျနိုင်ငံမှာ ဒီဇင်ဘာ ၂၈ ရက်က တနိုင်ငံလုံးမှာ ကိုဗစ်-၁၉ လူနာသစ် ၁၁,၂၆၄ ဦး တွေ့ရှိခဲ့လို့ ကူးစက်သူအရေအတွက် စံချိန်တင်ခဲ့တယ်လို့ ရိုက်တာသတင်းမှာ ဖော်ပြထားပါတယ်။

ကူးစက်မြန် အိုမီခရွန်ကို စိုးရိမ်နေရတဲ့ကြားထဲ လူနာအရေအတွက်ဟာ နေ့စဉ်တိုးနေတာကြောင့် ပြည်နယ်အချင်းချင်း အသွားအလာတွေ ပြန်ဖွင့်ဖို့နဲ့ စီးပွားရေးလုပ်ငန်းတွေ ပုံမှန်လည်ပတ်ဖို့ ကိစ္စမှာ အနှောင့်အယှက်တွေ ပြန်ဖြစ်လာပါတယ်။

သြစတြေးလျနိုင်ငံ လူဦးရေရဲ့သုံးပုံတစ်ပုံ နေထိုင်ရာ  နယူးဆောက်ဝေးလ်ပြည်နယ်ရဲ့ ကျန်းမာရေး ဝန်ကြီးက  ရောဂါစစ်ဆေးသူတွေ အလွန်များနေတာကြောင့် ကျန်းမာရေးဝန်ထမ်းတွေ မနိုင်မနင်း ဖြစ်နေပြီး ကျန်းမာရေးစနစ်အပေါ်မှာ ဝန်ပိနေရတယ်လို့ ပြောပါတယ်။

နယူးဆောက်ဝေးလ်ဟာ လူနာသစ်တွေ နေ့စဉ်တိုးနေတာကြောင့် မျက်နှာ နှာခေါင်းစည်း မတပ်မနေရ စည်းကမ်းကို အရင်တပတ် ကြာသပတေးနေ့က ပြန်ထုတ်ထားရတဲ့ ပြည်နယ်  ဖြစ်ပါတယ်။