ထိုင်းတောင်ပိုင်း၊ ရနောင်းခရိုင်ရှိ ကပ္ပလီပင်လယ်ပြင်ထဲမှာ နစ်မြုပ်လုဖြစ်နေတဲ့ မြန်မာငါး ဖမ်းစက်လှေတစ်စီးကို ထိုင်းရေတပ်က ကယ်တင်လိုက်တယ်လို့ Siam turakij ထိုင်းသတင်းမှာ ဖော်ပြပါတယ်။ 

ပြီးခဲ့တဲ့ ဒီဇင်ဘာ ၂၈ ရက်က ထိုင်းရေပိုင်နက် ကပ္ပလီပင်လယ်ထဲမှာ  မြန်မာ ငါးဖမ်းလှေတစ်စီး  စက်ချို့ယွင်းပြီး နစ်မြှုပ်မလိုဖြစ်နေကြောင်း ထိုင်းငါးဖမ်းလှေက အကြောင်းကြားလာတဲ့အတွက် အရင်ဆုံးရဟတ်ယာဉ်နဲ့ စုံစမ်းရှာဖွေပြီး တွေ့ရှိတဲ့အခါမှာ အမှတ် ၃ ထိုင်းရေတပ် ကယ်ဆယ်ရေးလှေနဲ့ သွားရောက်ကယ်တင်ခဲ့တယ်လို့ ရနောင်းခရိုင် ထိုင်း ရေပြင်သယံဇာတအရင်းအမြစ်ထိန်းသိမ်းရေးဌာန ဒုညွှန်မှူး ဗိုလ်မှူးကြီး အိတ်ထိဖတ်က ဝင်း ဖိုင်ဖူးကွန်းက သတင်းထောက်တွေကို ပြောပါတယ်။

ကနဦးစစ်ဆေးချက်အရ အဆိုပါငါးဖမ်းလှေဟာ စူရင်းကျွန်းစုနဲ့ ၂၀ မိုင်အကွာ၊ ရနောင်းမြို့နဲ့ ကီလိုမီတာ ၉၀ အကွာ ထိုင်းရေပိုင်နက်အစွန်းမှာ တိမ်းစောင်းတဲ့ အနေအထားရှိနေပြီး လှေပေါ်ပါလာသူတွေဟာ အဝတ်ကို အလံလုပ်ထောင်ကာ အကူအညီတောင်းနေကြောင်း၊ လှေသား ၆ ယောက်လုံး ရေထဲမကျအောင် အလံတိုင်ကိုဝိုင်းပြီး တွယ်ဖက်ထားကြတယ်လို့ ဆိုပါတယ်။ 

အဲဒီနောက် ထိုင်းရေတပ် အမှတ် ၃ နဲ့ စူရင်းကျွန်းအခြေစိုက်ကယ်ဆယ်ရေးလှေတို့ ရောက်သွားတဲ့အခါမှာ လှေဝမ်းထဲရေတွေဝင်နေလို့ တဘက်စောင်းကာ မြုပ်လုနီးပါးဖြစ်နေကြောင်း၊ လှေသား ၆ ယောက်ကို အရင်ဆုံး ရနောင်းမြို့ကို ခေါ်ဆောင်လာခဲ့တယ်လို့ ဆိုပါတယ်။ 

စစ်ဆေးမေးမြန်းချက်အရ အဆိုပါလှေဟာ မြန်မာပိုင်နက်ထဲက ငါးဖမ်းလှေဖြစ်ကြောင်း၊ စက်ချို့ယွင်းမှုဖြစ်လို့ မကြာခင်ကမှပြင်ဆင်ထားတာဖြစ်ပြီး ခုတခေါက်ငါးဖမ်းထွက်လာတော့ ပြန်ပျက်သွားကာ စက်နှိုးလို့မရဘဲ ရေစီးကြောင်းအတိုင်း မျောပါရင်း ထိုင်းရေပြင်ပိုင်နက်ထဲ ဝင်လာတာလို့ ဆိုပါတယ်။

တာဝန်ရှိသူတွေက အဆိုပါ မြန်မာရေလုပ်သား ၆ ယောက်စလုံးကို နှစ်နိုင်ငံနယ်ခြားပူးတွဲကော်မတီ - ရနောင်း (Thai & Myanmar Border Committee Office Ranong)  နဲ့ ချိတ်ဆက်ပြီး တဖက်နိုင်ငံကို ပြန်လည်ပို့ဆောင်ပေးလိုက်တယ်လို့ သတင်းမှာ ဖော်ပြပါတယ်။