ကမ္ဘာ့ဘောလုံးအဖွဲ့ချုပ် (ဖီဖာ) က ချီးမြှင့်မယ့် အကောင်းဆုံးကစားသမားဆုရွေးချယ်ရာမှာ မက်ဆီက ဆာလက်နဲ့ လီဝန်ဒေါစကီးတို့ထက်ပိုပြီးအားသာချက်ရှိနေပါတယ်။ 

ဖီဖာဟာ အကောင်းဆုံးဆုအတွက် နောက်ဆုံးဆန်ခါတင်သုံးဦးစာရင်းကို ပြီးခဲ့တဲ့ရက်ပိုင်းက ကြေညာသွားခဲ့ပြီး လာမယ့် ဇန်နဝါရီ ၁၇ ရက်မှာ ဆုချီးမြှင့်မှာဖြစ်ပါတယ်။ 

ဆုရွေးချယ်ရာမှာ ဖီဖာကိုယ်စားပြု ရွေးချယ်မယ့် ဒိုင်လူကြီးတွေအနေနဲ့ ၂၀၂ဝ ပြည့်နှစ် အောက်တိုဘာလကနေ ၂၀၂၁ ခုနှစ် သြဂုတ်လအထိ စွမ်းဆောင်ရည်ကိုပဲ  လေ့လာသုံးသပ်ပြီး ဆုချီးမြှင့်မယ်လို့ တရားဝင်ကြေညာထားပါတယ်။ 

ဒါကြောင့် ပီအက်စ်ဂျီတိုက်စစ်မှူး မက်ဆီက အခုနှစ်ရာသီမှာ ခြေစွမ်းမပြနိုင်သေးပေမယ့် မနှစ်က စုစုပေါင်း ၄၇ ပွဲမှာ ၄၃ ဂိုးသွင်းခဲ့သလို ကိုပါအမေရိကဖလားလည်းရရှိခဲ့တာကြောင့် အားသာချက်ပိုရှိနေတာပါ။ 

ဘိုင်ယန်တိုက်စစ်မှူး လီဝန်ဒေါစကီးက ၅၁ ဂိုး သွင်းခဲ့လို့ ကလပ်နဲ့စွမ်းဆောင်ရည်မှာ ယှဉ်နိုင်ပေမယ့် ဆာလက်ကတော့ အခုနှစ်ရာသီမှာ ပိုမိုခြေစွမ်းပြသခဲ့တာတွေက ထည့်သွင်းတွက်ချက်မှာ မဟုတ်ကြောင်း ဒေးလီးမေးလ်သတင်းစာက ထောက်ပြခဲ့ပါတယ်။ 

ဖီဖာကချီးမြှင့်မယ့် အကောင်းဆုံးဆုရွေးချယ်ရာမှာ နိုင်ငံ့လက်ရွေးစင်အသင်းနည်းပြနဲ့ အသင်းခေါင်းဆောင်တွေ၊ ဂျာနယ်လစ်တွေရဲ့ မဲပေးမှုကိုလည်း ထည့်သွင်းတွက်ချက်ပါတယ်။ ဒါ့အပြင် ပရိသတ်တွေကလည်း ဖီဖာဝက်ဘ်ဆိုဒ်မှာ မှတ်ပုံတင်ပြီး ဝင်ရောက်မဲပေးနိုင်ပါတယ်။