တနင်္သာရီတိုင်း၊ မြိတ်ခရိုင် ပုလောမြို့နယ်အတွင်းမှာ ဖေဖော်ဝါရီ ၃ ရက်နေ့ မနက်ပိုင်းကစပြီး ကရင်အမျိုးသားအစည်းအရုံး (KNU)၊ ပူးပေါင်း ပုလော PDF အဖွဲ့တွေနဲ့ စစ်ကောင်စီတပ်တို့ တိုက်ပွဲဖြစ်ပွားနေပြီး နေ့လယ်ပိုင်းအထိ စစ်ကောင်စီဘက်က ၅ ယောက်သေဆုံးသွားတယ်လို့ ပုလော PDF အဖွဲ့က ထုတ်ပြန်ထားပါတယ်။

တိုက်ပွဲဖြစ်ပွားနေတဲ့အချိန် စစ်ကောင်စီဘက်က ထိခိုက်သေဆုံးသူ ၅ ဦးထက်မနည်း တွေ့လိုက်ရတယ်လို့ တိုက်ပွဲအတွင်းရောက်ရှိနေတဲ့ ပုလော PDF အဖွဲ့က တာဝန်ရှိသူတစ်ဦးက ပြောပါတယ်။ 

ဒါ့အပြင် စစ်ကောင်စီဘက်က‌နေ လက်နက်ကျည်တစ်ချို့ကိုလည်း သိမ်းဆည်းရမိခဲ့တယ်လို့ ထုတ်ပြန်ချက်မှာ ဖော်ပြထားပါတယ်။

KNU ထိန်းချုပ်နယ်မြေထဲ ကျူးကျော်ဝင်ရောက်လာပြီး တပ်စွဲနေတဲ့ စစ်ကောင်စီတပ်ဖွဲ့တွေနဲ့ ပုလောမြို့ အရှေ့ဘက် ၅ မိုင်လောက်အကွာ ဒူးရင်းပင်ရှောင်ကျေးရွာအုပ်စု ဥယျာဉ်ခြံတွေထဲမှာ တိုက်ပွဲဖြစ်ပွားနေကြတာပါ။ 

စစ်ကောင်စီဘက်က စစ်ကြောင်း ၂ ကြောင်းခွဲပြီး အင်အား ၁၀၀ ကျော်နဲ့ ထိုးစစ်ဆင်လာတာဖြစ်ကာ စစ်ကြောင်းတလျှောက်မှာရှိတဲ့ ဒေသခံတွေကိုလည်း ဖမ်းဆီးပြီး လူသားဒိုင်းသဖွယ်ပြုလုပ်နေတယ်လို့ ဒေသခံတွေက ပြောပါတယ်။ 

လက်ရှိမှာ စစ်ကောင်စီဘက်က အင်အားဖြည့်ပြီး ထပ်တိုးလာတဲ့အတွက် ဒေသတွင်းမှာ တိုက်ပွဲတွေ ပိုမိုပြင်းထန်လာနိုင်တယ်လို့ ဒေသတွင်းသတင်းရင်းမြစ်တွေအရ သိရပါတယ်။ 

တိုက်ပွဲအခြေအနေနဲ့ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။