အန်အယ်လ်ဒီပါတီ လွှတ်တော်ကိုယ်စားလှယ်တယောက်အပါအဝင် ပြည်သူ အယောက် ၂၀ ကျော်ကို ဖေ့စ်ဘွတ်ခ်လူမှုကွန်ရက်အကောင့်မှာ ပို့စ်တင်တာကြောင့်ဆိုပြီး ဖမ်းဆီး အမှုဖွင့်လိုက်တယ်လို့  စစ်ကောင်စီပြန်ကြားရေးက သတင်းထုတ်ပါတယ်။

နိုင်ငံတော်တည်ငြိမ်အေးချမ်းရေးကို ပျက်ပြားစေဖို့ ရည်ရွယ်ပြီး လှုံ့ဆော်၊ ဝါဒဖြန့်တာတွေကြောင့် ဖြစ်တယ်လို့ စစ်ကောင်စီပြန်ကြားရေးက ဖေဖော်ဝါရီ ၁ ရက်နဲ့ ၂ ရက်နေ့တွေမှာ သတင်းထုတ်ပြန်ထားတာပါ။  ဒါပေမဲ့ ဘယ်လို အကြောင်းအရာတွေကို ဖေ့စ်ဘွတ်ခ်မှာ တင်ခဲ့တယ်ဆိုတာကတော့ သေသေချာချာ အသေးစိတ် ဖော်ပြထားတာမရှိပါဘူး။

သူတို့ကို ဖမ်းဆီးထိန်းသိမ်း အမှုဖွင့်ထားတယ်လို့ ဆိုပေမဲ့ လူ ၂၀ ကျော်လုံးကို ဘယ်မှာ  ဖမ်းဆီးထားတယ် ဘာအမှုနဲ့ အမှုဖွင့်ထားတယ်ဆိုတာလည်း မဖော်ပြထားပါဘူး။

ဖမ်းဆီးခံရသူတွေထဲမှာ မကွေးတိုင်း၊ ပခုက္ကူမြို့နေ မချောစုဝင်း(ခ) ချောစု၊ ဆိပ်ဖြူမြို့နေ ဦးဌေးမိုးလွင်၊ ရန်ကုန်တိုင်း၊ ဒဂုံမြို့သစ်(အရှေ့ပိုင်း)မြို့နယ်နေ မသန္တာအောင်၊ ဒဂုံမြို့သစ်(မြောက်ပိုင်း)မြို့နယ်၊ (၃၈)ရပ်ကွက်နေ မထိုက်ထိုက်ဝေနဲ့ ကိုနေလင်းထက်၊ ခရမ်းမြို့နေ တိုင်းဒေသကြီး (၂) NLD ပါတီဝင် လွှတ်တော်ကိုယ်စားလှယ် ဦးသိန်းဇော်လတ်၊ တောင်ဥက္ကလာပမြို့နယ်နေ မဝေသွယ်ထွန်းနဲ့ ကိုမောင်မောင်အေး၊ တိုက်ကြီးမြို့နယ်နေ မသန္တာမြင့် (ခ) ရရှီဒါ၊ သာကေတမြို့နယ်နေ ကိုနိုင်ဝင်းကျော်(ခ)ကိုနိုင်၊ ကုမုဒြာသန်းဝင်း (ခ) မုနဲ့ မမိုးသက်ချို(ခ) အိတုံ၊ ပျဉ်းမနားမြို့နေ မစုစုနိုင်စိုး၊ ကချင်ပြည်နယ်၊ ဗန်းမော်မြို့နယ်နေ ကိုကျော်ဇေယျ၊ စစ်ကိုင်းတိုင်း၊ ကလေးမြို့နေ ကိုကျော်သူရ(ခ) စတိန်နာရမ်၊ ပဲခူးတိုင်း၊ ဖြူးမြို့နေ မမီးမီး(ခ) မီမီဆွေသည် ဒိုက်ဦးမြို့နေ ကိုသီဟထက်အောင်၊ ပဲခူးမြို့နေ မသီတာညိုသောင်းနဲ့ မသိင်္ဂီအောင်၊ မန္တလေးတိုင်း၊ ချမ်းအေးသာစံမြို့နယ်နေ ကိုအောင်ဌေး (ခ)အောင်ခိုင်၊ မဟာအောင်မြေမြို့နယ်နေ မမြင့်မြင့်စန်း၊ ဧရာဝတီတိုင်း၊ ပုသိမ်မြို့နေ မဝါဝါလှိုင်(ခ)ဝါဝါနှင့် မငြိမ်းအေးအောင်တို့ကို ဖမ်းဆီး အမှုဖွင့်ထားတယ်လို့ စစ်ကောင်စီက ထုတ်ပြန်ပါတယ်။

CRPH NUG နဲ့ သူတို့ရဲ့ ဆက်နွှယ်နေတဲ့ လက်အောက်ခံအဖွဲ့တွေ၊ လူပုဂ္ဂိုလ်တွေက လှုံ့ဆော်တာတွေကို လိုက်ပါလုပ်ဆောင်ရင်၊ အသံနဲ့ဖြစ်ဖြစ်၊ ပြုလုပ်တာပဲ ဖြစ်ဖြစ် တနည်းနည်းနဲ့ ဖြစ်ဖြစ်၊ အများပြည်သူ အနှောင့်အယှက်ဖြစ်အောင်လုပ်ရင်၊ လှုံ့ဆော်တာတွေကို ထပ်ဆင့်မျှဝေ အားပေးကူညီရင် အမှု ၄ မှုနဲ့ အရေးယူခံရမယ်လို့ စစ်ကောင်စီကဆိုပါတယ်။

အကြမ်းဖက်မှု တိုက်ဖျက်ရေးဥပဒေပုဒ်မ ၅၂(က)၊ ရာဇသတ်ကြီးပုဒ်မ ၁၂၄-က နဲ့ ပုဒ်မ ၅၀၅-က၊ အီလက်ထရောနစ် ဆက်သွယ်ရေးဥပဒေပုဒ်မ ၃၃(က)နဲ့ တခြား တည်ဆဲဥပဒေတွေအရ အရေးယူခံရမယ့်အပြင် ပြစ်မှုနဲ့ သက်ဆိုင်တဲ့ ရွှေ့ပြောင်းနိုင်တဲ့ပစ္စည်း၊ မရွှေ့ပြောင်းနိုင်တဲ့ ပစ္စည်းတွေကို အကြမ်းဖက်မှု တိုက်ဖျက်ရေး ဥပဒေအရ သိမ်းဆည်းခံရနိုင်ပြီး ပြစ်မှုမြောက်တယ်လို့ ဆုံးဖြတ်ရင် နိုင်ငံတော်ဘဏ္ဍာအဖြစ် သိမ်းဆည်းခံရနိုင်တယ်လို့ အသိပေးထားပြီးဖြစ်ကြောင်းလည်း စစ်ကောင်စီက ဆိုပါတယ်။

စစ်တပ်အာဏာသိမ်းပြီးနောက် ဖေ့စ်ဘွတ်ခ်လူမှုကွန်ရက်ပေါ်ကနေ စစ်အာဏာရှင်ဆန့်ကျင် နွေဦးတော်လှန်ရေးကို အားပေးထောက်ခံခဲ့ သူတွေကို ရာဇသတ်ကြီး ပုဒ်မ ၅၀၀ (က)နဲ့  ဖမ််းဆီး  အမှုဖွင့် အရေးယူတာရှိခဲ့သလို အခုလည်း လူမှုကွန်ရက်တွေကို စောင့်ကြည့်ပြီး စစ်အာဏာရှင်ကို  မဆန့်ကျင်ရဲအောင် ပြည်သူတွေကို အခုလို ဖမ်းဆီး အရေးယူတာတွေ ထပ်လုပ်လာပါ။

အာဏာသိမ်း စစ်တပ်ဟာ သတင်းမီဒီယာတွေနဲ့ သတင်းသမားတွေကို ဖမ်းဆီးထောင်ချ ဖိနှိပ်မှုတွေ  ဆက်တိုက်လုပ်ဆောင်နေသလို ပြည်သူတွေရဲ့ လွတ်လပ်စွာထုတ်ဖော်ခွင့်ကိုလည်း ချိုးဖောက် နေတဲ့လို့ သတင်းလွတ်လပ်ခွင့် စောင့်ကြည့်အဖွဲ့တွေက ထုတ်ပြန်ထားပါတယ်။