မြန်မာနိုင်ငံမှာ  ၂၀၂၁ ခုနှစ် ဖေဖော်ဝါရီလ စစ်တပ်အာဏာသိမ်းပြီး နောက်ပိုင်း နေရပ်စွန့်ခွာထွက်ပြေးရတဲ့  ဒုက္ခသည် အရေအတွက်က  နှစ်ဆတိုးလာခဲ့ပြီး လူဦးရေ ၈ သိန်းထိ ရောက်သွားပြီလို့ ကုလသမဂ္ဂဒုက္ခသည်များဆိုင်ရာအေဂျင်စီ UNHCR ကပြောပါတယ်။

UNHCR ပြောရေးဆိုခွင့်ရှိသူ မက်သရူးဆော့မတ်ရှ်က ဆွစ်ဇာလန်နိုင်ငံ ဂျီနီဗာမြို့မှာ  ပြုလုပ်တဲ့ သတင်းစာရှင်းလင်းပွဲမှာ ပြောကြားတာဖြစ်ပြီး  ကုလသမဂ္ဂဒုက္ခသည်များဆိုင်ရာအေဂျင်စီ အနေနဲ့ မြန်မာနိုင်ငံက သိန်းနဲ့ချီတဲ့ ပြည်တွင်းနေရပ်စွန့်ခွာဒုက္ခသည် (IDP) တွေကိုကူညီဖို့ အရှိန်မြှင့်လုပ်ဆောင်နေတယ်လို့လည်း ပြောပါတယ်။

UNHCR အချက်အလက်အရ ၂၀၂၁ ခုနှစ် ဖေဖော်ဝါရီလကစပြီး အသစ်ရွှေ့ပြောင်းနေထိုင်သူ ၄ သိန်း ၄ သောင်းလောက်ရှိပြီး အစောပိုင်းက အိုးအိမ်စွန့် ထွက်ပြေးရသူပေါင်း လက်ရှိအရေအတွက် ၃ သိန်း ၇ သောင်းကို ထပ်တိုးလာတာဖြစ်ပါတယ်။

မြန်မာနိုင်ငံအရှေ့တောင်ပိုင်းက ကရင်ပြည်နယ်၊ ကယား၊ မွန်နဲ့ ရှမ်း(တောင်ပိုင်း) ပြည်နယ်တွေအပြင် ပဲခူးတိုင်းဒေသကြီး(အရှေ့)နဲ့ တနင်္သာရီတိုင်း ဒေသကြီးတို့မှာ အိုးမဲ့အိမ်မဲ့အသစ် ၄ သိန်း ၄ သောင်းကျော်ရဲ့ ထက်ဝက်ကျော် ရှိနေပါတယ်။

ကရင်နဲ့ ကယားပြည်နယ်တို့မှာ ပစ်ခတ်တိုက်ခိုက်မှုတွေ အကြီးအကျယ် ဖြစ်ပေါ်နေတာကြောင့် ဘေးလွတ်ရာကို ရွှေ့ပြောင်းရမှု အများဆုံးဖြစ်ပါတယ်။

ရခိုင်ပြည်နယ်အတွင်း စခန်းတွေ၊ ကျေးရွာတွေနဲ့ အိုးအိမ်စွန့်ခွာပြေးရတဲ့နေရာတွေက လူပေါင်း ၁၄၈,၀၀၀ လောက် အပါအဝင် နိုင်ငံမဲ့ ရိုဟင်ဂျာ ၆ သိန်းလောက်ဟာ အလွန်ထိခိုက်လွယ်တဲ့ အခြေအနေမှာ ရှိနေသေးပြီး လူသားချင်းစာနာထောက်ထားမှု အကူအညီတွေလည်း လိုအပ်နေပါသေးတယ်လို့ ဆိုပါတယ်။