ယူကရိန်းနိုင်ငံဆိုင်ရာ အမေရိကန်သံရုံးရဲ့ လုပ်ငန်းဆောင်ရွက်ရာဌာနတွေကို ယူကရိန်းမြို့တော် ကိယက်ဗ်ကနေ နိုင်ငံအနောက်ပိုင်း ပိုလန်နိုင်ငံနဲ့ နယ်စပ်မိုင် ၅၀ အကွာက လယ်ဗိဗ်မြို့ဆီကို ပြောင်းရွှေ့လိုက်ပြီလို့ အမေရိကန်နိုင်ငံခြားရေးဝန်ကြီး အန်ထော်နီဘလင်ကန်က ဖေဖော်ဝါရီ ၁၄ ရက်မှာ ပြောလိုက်ပါတယ်။

ရုရှားအစိုးရဟာ မြို့တော် ကိယက်ဗ်အပါအဝင် ယူကရိန်းကို အချိန်မရွေး တိုက်ခိုက်နိုင်တယ်လို့ အမေရိကန်အရာရှိတွေက သတိပေးအပြီး ခုလို သံရုံးရွှေ့လိုက်တာပါ။

သံရုံးဝန်ထမ်း အများစုကိုတော့ ယူကရိန်းနိုင်ငံထဲကနေ ထွက်ခွာသွားဖို့ အမိန့်ထုတ်ထားပြီး သံရုံးဝန်ထမ်းတွေ ဘေးကင်းရေး စိုးရိမ်တာကြောင့် ခုလို ဆုံးဖြတ်တာလို့ ဘလင်ကန်က ကြေညာချက် ထုတ်ပြန်ပြောဆိုပါတယ်။ အမေရိကန် နိုင်ငံသားတွေကိုလည်း ယူကရိန်းနိုင်ငံထဲကနေ ထွက်သွားဖို့ အကြံပြုထားပါတယ်။ 

အမေရိကန်သံရုံးဟာ မြို့တော်ကိယက်ဗ်က ယူကရိန်းအစိုးရနဲ့ ဆက်ပြီး အလုပ်လုပ်နေမယ်လို့လည်း ဘလင်ကန်က ပြောပါတယ်။

ရုရှားစစ်သည်အင်အား ၁ သိန်းကျော်ဟာ ယူကရိန်းရဲ့အရှေ့ဘက် နယ်စပ်နားမှာ အင်အားစုဆောင်းနေပြီး ယူကရိန်းမြောက်ဘက် နယ်စပ်နားက ဘဲလာရုစ်နိုင်ငံအတွင်းမှာလည်း ရုရှားတပ်တွေ ပိုတိုးချထားပါတယ်။