ရုရှားက ယူကရိန်းကို တိုက်ခိုက်ခဲ့ပါက ချက်ချင်းဒဏ်ခတ်ပြီး အပြင်းအထန် တုံ့ပြန်မယ်လို့ ဂျာမန်အဓိပတိ အောလော့ဖ်ရွှိုက်ဇ်က ရုရှားအစိုးရကို ဖေဖော်ဝါရီ ၁၃ ရက်မှာ သတိပေးလိုက်ပါတယ်။ 

ရုရှားသမ္မတ ဗလာဒီမီယာပူတင်နဲ့ ဒီအပတ်အစည်းအဝေးမတိုင်ခင် ပြောဆိုလိုက်တာပါ။

ရွှိုက်ဇ်ဟာ စစ်ရေးတင်းမာမှု ပြေလျော့စေဖို့ သံတမန်ရေး အားထုတ်တဲ့အနေနဲ့ ယူကရိန်းသမ္မတ ဗိုလိုဒိုမြာ ဇေလန်စကီနဲ့ တွေ့ဖို့ ယူကရိန်းကို တနင်္လာနေ့က လာခဲ့တာပါ။ အင်္ဂါနေ့မှာ ရုရှားမြို့တော် မော်စကိုကို သွားပြီး သမ္မတ ဗလာဒီမီယာပူတင်နဲ့ တွေ့ဆုံမယ်လို့ ပြောပါတယ်။

“ယူကရိန်းအပေါ် စစ်ရေးရန်လိုမှုဟာ သူ့ရဲ့ ပိုင်နက်ဂုဏ်သိက္ခာကို အန္တရာယ်ဖြစ်စေမယ် အချုပ်အခြာအတွက် ပြင်းထန်တဲ့ တုံ့ပြန်မှုတွေ အဖြေထွက်လာလိမ့်မယ်။ ကျနော်တို့ကလည်း ဥရောပနဲ့ နေတိုး စစ်ရေးမဟာမိတ်အဖွဲ့ထဲက မိတ်ဖက်တွေနဲ့အတူ ချက်ချင်း သက်ရောက်မယ့် ဒဏ်ခတ်မှုတွေကို သေသေချာချာ ပြင်ဆင်ထားတယ်”လို့ ရွှိုက်ဇ်က ပြောပါတယ်။

ယူကရိန်း နယ်စပ်နားမှာ စစ်သည်အင်အား ၁ သိန်းကျော် တပ်ချထားတဲ့ ရုရှားဟာ အချိန်မရွေး ကျူးကျော်လာနိုင်တယ်လို့ အမေရိကန်က ပြောထားပါတယ်။

ရုရှားကတော့ အဲဒီလိုအစီအစဉ်မရှိဘူးလို့ ငြင်းရင်း သူ့လုပ်ရပ်ဟာ နေတိုးအဖွဲ့ဝင်နိုင်ငံတွေရဲ့ ရန်လိုမှုကို တုံ့ပြန်ဖို့လို့ ပြောထားပါတယ်။