အစ္စရေးနဲ့ ပါလက်စတိုင်းပြဿနာကို နှစ်နိုင်ငံ နှုတ်အားဖြင့် ဆွေးနွေး အဖြေရှာရေး လမ်းစဉ်အစား လက်တွေ့ အဖြေရှာရေးလမ်းစဉ်ကို ပိုပြီးလိုလားတယ်လို့ အစ္စရေးကာကွယ်ရေးဝန်ကြီး ဘန်နီဂန့်ဇ်က ပြောကြားလိုက်ပါတယ်။

“နှစ်နိုင်ငံ အဖြေရှာရေးလမ်းစဉ်ဟာ တရားဝင် မူဘောင်တရပ်ဆီကို ခေါ်သွားပြီး ၁၉၆၇ နယ်စပ်မျဉ်းတွေကို ထင်ယောင်ထင်မှား ဖြစ်စေလို့ ကျနော် အဲဒီအကြောင်း မပြောဘူး။ ဒါတွေက ဖြစ်မလာနိုင်ဘူး။ ဒါကြောင့် ကျနော်တို့ရဲ့ လုံခြုံရေးတောင်းဆိုချက်တွေနဲ့ အခွင့်အရေးတွေ သေချာပေါက်ရဖို့ တကယ့်ကို လိုအပ်ပြီး တခြားတဘက်မှာ ပါလက်စတိုင်း အခွင့်အရေးကို ဘယ်လို သေချာအောင် လုပ်ပေးနိုင်မလဲဆိုတာ ကျနော်တို့ စိစစ်မယ်။ ဒါဟာ မျက်မြင်ထင်ရှား လက်တွေ့ ဖြစ်တည်မှုနှစ်ရပ် အဖြေရှာရေး လမ်းစဉ်ပဲ” လို့ ဂန့်ဇ်က မြူးနစ် လုံခြုံရေးညီလာခံမှာ ပြောပါတယ်။

ဂန့်ဇ်ဟာ ပင်လယ်ကွေ့ဒေသအတွင်း တင်းမာမှုမြင့်နေချိန် ဖေဖော်ဝါရီလဆန်းပိုင်းက ဘာရိန်းနိုင်ငံကို သွားရောက်လည်ပတ်ပြီး လုံခြုံရေး ပူးပေါင်းဆောင်ရွက်ရေးအတွက် လက်မှတ်ထိုးခဲ့သူပါ။

အစ္စရေးဟာ ဒေသတွင်းက ခေါင်းဆောင်သစ်တွေဆီ ငြိမ်းချမ်းရေးလက်ကို ပိုပြီး ကမ်းပေးချင်တယ်လို့လည်း ဂန့်ဇ်က ပြောပါတယ်။

မြူးနစ်လုံခြုံရေးညီလာခံမှာ အီရန်နိုင်ငံအတွင်းက အခြေအနေတွေကို အာရုံစိုက်ဆွေးနွေးခဲ့ကြပြီး ဂန့်ဇ်ကလည်း ခေါင်းဆောင်တွေအနေနဲ့ အီရန်ကို သတိနဲ့ဆက်ပြီး ရှုမြင်ကြဖို့ တိုက်တွန်းခဲ့ပါတယ်။