ကရင်ပြည်နယ်၊ ကော့ကရိတ်မြို့နယ်၊ ကမိုင်ကုန်းကျေးရွာမှာ ဖေဖော်ဝါရီ ၂၀ ရက် ည ၉ နာရီလောက်က  စစ်ကောင်စီရဲ့တပ်နဲ့ KNLA ပူးပေါင်းတပ်တို့ တိုက်ပွဲ​ဖြစ်ပွားခဲ့ပါတယ်။

နယ်​မြေကျော်ဝင်ရောက်လာတဲ့ စစ်ကောင်စီတပ်နဲ့ KNLA (ကွန်မန်ဒို) ပူးပေါင်းတပ်တွေအကြား တိုက်ပွဲဖြစ်ပွားခဲ့​ရာမှာ ကျေးရွာအတွင်းကို လက်နက်ကြီးနဲ့ ပစ်ခတ်ခဲ့တဲ့အတွက်  လူနေအိမ်တွေ လက်နက်ကြီးစတွေ ထိမှန်ပျက်စီးခဲ့သလို့ ဒေသခံတွေဟာ ညတွင်းချင်း ထွက်ပြေးတိမ်းရှောင်ခဲ့ရပါတယ်။

ကမိုင်ကုန်းကျေးရွာသား တစ်ဦးက" လက်နက်ကြီးတွေနဲ့ ပစ်ခတ်လို့ ညတွင်းချင်း မှောင်နဲ့မည်းမည်းနဲ့ ထွက်ပြေးခဲ့ရတယ်။  အိမ်တချို့ ထိမှန်တယ်။ တိုက်ပွဲဖြစ်ခဲ့လို့ သက်သက်မဲ့  အရပ်သားပြည်သူတွေကို ဒုက္ခပေးတာ"လို့ ဆိုပါတယ်။ 

စစ်ကောင်စီရဲ့တပ်တွေဟာ ညအချိန် နယ်မြေကျော်စစ်ရေးလှုပ်ရှားလာတဲ့အတွက် နှစ်ဖက်တိုက်ပွဲဖြစ်ပွားခဲ့တာဖြစ်ပြီး တိုက်ပွဲအတွင်း စစ်ကောင်စီဘက်က ပစ်ခတ်ပြီး လက်နက်ကြီးနဲ့ပစ်ပြီး ပြန်လည်ဆုတ်ခွာသွားခဲ့တယ်လို့ ကေအန်ယူတာဝန်ရှိသူက ဆိုပါတယ်။

ဖေဖော်ဝါရီ ၁၇ ရက်က နယ်မြေကျော်ဝင်ရောက်လာတဲ့ စစ်ကောင်စီရဲ့တပ်တွေနဲ့ တပ်မဟာ ၆ လက်အောင်ခံနယ်မြေခံ KNLA ပူးပေါင်းတပ်ဖွဲ့ဝင်တွေနဲ့ နှစ်ဖက် တိုက်ပွဲဖြစ်ပွားခဲ့ပါတယ်။

လတ်တလော စစ်ကောင်စီရဲ့ စစ်ရေးလှုပ်ရှားမှု​တွေကြောင့် ဒေသခံပြည်သူတွေဟာ စားဝတ်နေရေးအတွက် လယ်ယာ၊ ဥယျာဥ်ခြံလုပ်ငန်းတွေကို  လုပ်ကိုင်ဆောင်ရွက်နေရပေမယ့် တိုက်ပွဲတွေဖြစ်ပွားမှာကို စိုးရိမ်နေ​ကြပါတယ်။

နှစ်ဖက်တိုက်ပွဲအတွင်း မြေပြင်လက်နက်ကြီးပစ်ခတ်တာ၊ လေကြောင်းကနေဗုံးကြဲ ပစ်ခတ်တာတွေကြောင့် အရပ်သားပြည်သူတွေ ထိမှန်သေဆုံးပြီး ဒဏ်ရာရရှိခဲ့တဲ့အပြင် နေအိမ်တွေ ထိမှန်ပျက်စီးတာ၊ အိမ်မွေးတိရိစ္ဆာန်တွေပါ  ထိမှန်သေဆုံးခဲ့ပါတယ်။

အဆိုပါတိုက်ပွဲတွေကြောင့် ထောင်နဲ့ချီတဲ့ ဒေသခံပြည်သူတွေဟာ နီးစပ်ရာ ဆွေမျိုးတွေဆီနဲ့ တောတွေထဲမှာ ဒီကနေ့အထိ ထွက်ပြေးတိမ်းရှောင်နေပါတယ်။