ရုရှားကိုပြန်တိုက်ရန် ယူကရိန်း ဘီယာစက်ရုံက ဓာတ်ဆီပုလင်းဗုံးများ ပြောင်းလဲထုတ်လုပ်
ယူကရိန်း ဘီယာစက်ရုံဟာ ဘီယာချက်လုပ်မယ့်အစား ရုရှားစစ်တပ်ကို ပြန်တိုက်ဖို့ ဓာတ်ဆီပုလင်းဗုံးတွေ ပြောင်းလဲ ထုတ်လုပ်နေပါတယ်။
ယူကရိန်းအနောက်ပိုင်း လစ်ဗီယွတ်မြို့က ပရပ်ဗ်ဒါ ဘီယာစက်ရုံက ရုရှားသမ္မတ ဗလာဒီမီယာ ပူတင်ပုံ တံဆိပ်ကပ်ထားတဲ့ ဓာတ်ဆီပုလင်းဗုံးတွေကို ထုတ်လုပ်ရင်း စစ်ပွဲမှာ ပါဝင်ဖို့ ဆုံးဖြတ်ခဲ့ပါတယ်။
ယူကရိန်း ကာကွယ်ရေးဝန်ကြီးဌာနက ပြည်သူတွေ နိုင်ငံကို ကာကွယ်ဖို့ ဓာတ်ဆီပုလင်းဗုံးတွေကို လုပ်ကြဖို့ ဖေဖော်ဝါရီ ၂၅ ရက်က အားပေးခဲ့ပါတယ်။
ဗုံးလုပ်နည်းကိုလည်း ဝန်ကြီးဌာနရဲ့ အင်တာနက်စာမျက်နှာပေါ်မှာ ညွှန်ကြားချက်ကို တင်ထားခဲ့ပါတယ်။
ယူကရိန်းကို အုပ်ချုပ်နေတဲ့ နာဇီလက်သစ်တွေက ရုရှားလုံခြုံရေးကို ခြိမ်းခြောက်နေတယ်လို့ ပြောရင်း အနောက်နိုင်ငံတွေရဲ့ သီတင်းပတ်ချီ သတိပေးချက်ကို လျစ်လျူရှုပြီး အထူးစစ်ဆင်ရေး ဆင်နွှဲဖို့ ပူတင်က အမိန့်ထုတ်ခဲ့တာပါ။
အနောက်နိုင်ငံတွေနဲ့ ယူကရိန်းကတော့ ရုရှားရဲ့ စွဲချက်က အခြေအမြစ်မရှိတဲ့ ဝါဒဖြန့်ချိရေး သက်သက်ပဲလို့ ပြောခဲ့ပါတယ်။
ရုရှားရဲ့ တိုက်ခိုက်မှုဟာ ဒုတိယကမ္ဘာစစ်နောက်ပိုင်း ဥရောပမှာ တနိုင်ငံက တခြားတနိုင်ငံကို အကြီးဆုံး တိုက်ခိုက်မှုဖြစ်လာခဲ့ပြီး ဥရောပတိုက်ရဲ့ စစ်အေးခတ်နှောင်းပိုင်း ဖွဲ့စည်းပုံကို ပြောင်းပြန်လှန်သွားအောင် ခြိမ်းခြောက်နေတယ်လို့ ရိုက်တာသတင်းမှာ ဖော်ပြထားပါတယ်။
