ထိုင်ဝမ်ကို တရားဝင်အသိအမှတ်ပြုဖို့ အမေရိကန်အစိုးရကို တောင်းဆိုတဲ့ အမေရိကန် နိုင်ငံခြားရေးဝန်ကြီးဟောင်း မိုက်ခ်ပွန်ပေအိုဟာ အဓိပ္ပာယ်မရှိတဲ့ စကားတွေကို ပြောနေတယ်လို့ တရုတ် နိုင်ငံခြားရေးဝန်ကြီးဌာနက မတ်လ ၄ ရက်မှာ တုံ့ပြန်ပြောလိုက်ပါတယ်။

ပွန်ပေအိုဟာ ထိုင်ဝမ်မြို့တော် ထိုင်ပေမှာ ထိုင်ဝမ်သမ္မတနဲ့ မတ်လ ၃ ရက်က တွေ့ဆုံအပြီး သမ္မတကပေးတဲ့ ဂုဏ်ပြုဆုကို လက်ခံခဲ့ပါတယ်။ အဲဒီနောက်ပြောတဲ့ မိန့်ခွန်းအတွင်း ထိုင်ဝမ်ကို အမေရိကန် အစိုးရက တရားဝင် အသိအမှတ်ပြုဖို့ တောင်းဆိုခဲ့တာပါ။

အများယုံကြည် လက်ခံနိုင်စွမ်းကုန်သွားတာ ကြာလှပြီဖြစ်တဲ့ နိုင်ငံရေးသမားဟောင်းလို့လည်း တရုတ်နိုင်ငံခြားရေးဌာန ပြောခွင့်ရ ဝမ်ဝင်ဘင်က ပွန်ပေအိုကို ခေါ်ဝေါ်သုံးနှုန်းလိုက်ပါတယ်။ ဒီလိုလူက အဓိပ္ပာယ်မရှိတဲ့ စကားတွေ ပြောလာတာ အောင်မြင်မှာ မဟုတ်ဘူးလို့လည်း ဝမ်က ပေကျင်းမြို့တော်က သတင်းစာရှင်းလင်းပွဲအတွင်း ပြောပါတယ်။

အမေရိကန်အစိုးရဟာ တရုတ်ကို အသိအမှတ်ပြုလိုက်တဲ့ ၁၉၇၉ ခုနှစ်မှာ ထိုင်ဝမ်နဲ့ တရားဝင် သံတမန်ဆက်ဆံရေးကို အဆုံးသတ်ခဲ့တာပါ။

တရုတ်ကတော့ အမေရိကန်နဲ့ ဆက်ဆံရေးမှာ ထိုင်ဝမ်အရေးက အရေးအကြီးဆုံးနဲ့ အထိခိုက်မခံဆုံး အရေးပဲလို့ ပြောထားပါတယ်။