ပခုက္ကူမြို့ မြို့ရှောင်လမ်းမှာ မတ် ၄ ရက်က ပခုက္ကူနည်းပညာတက္ကသိုလ် ပထမနှစ် ကျောင်းသားတွေ အပါအဝင် ၅ ယောက်ကို စစ်ကောင်စီတပ်တွေနဲ့ ရဲတွေက ဖမ်းဆီးသွားတယ်လို့ ပခုက္ကူနည်း ပညာတက္ကသိုလ် ကျောင်းသားသမဂ္ဂက မတ်လ ၅ ရက် ဒီကနေ့ ထုတ်ပြန်ပါတယ်။

မြို့ရှောင်လမ်းက ပူးပေါင်းစစ်ဆေးရေးဂိတ်မှာ မနေ့က နေ့လယ်က နည်းပညာတက္ကသိုလ် ပထမနှစ်ကျောင်းသား ကိုလင်းဆက်အောင်နဲ့ လူငယ် တစ်ယောက် ဆိုင်ကယ်စီးလာတာကို စစ်ကောင်စီတပ်တွေနဲ့ ရဲတွေက တားပြီးဖမ်းဆီးသွားတာလို့ နည်းပညာတက္ကသိုလ် ကျောင်းသား တစ်ယောက်က ပြောပါတယ်။

သူတို့နှစ်ယောက်ကို ဖမ်းဆီးပြီး သူငယ်ချင်းနှစ်ယောက်ဆီကို စစ်အုပ်စုတွေက ဟန်ဆောင်ဖုန်းဆက်ကာ နေရာမေးပြီး 7Star စာဖွယ်စုံဆိုင်မှာ ဝင်ရောက်စီးနင်း ဖမ်းဆီးသွားတာလို့ ဆိုပါတယ်။

ဒါအပြင် ပခုက္ကူမြို့ရှောင်လမ်းမှာ အမျိုးသားတစ်ယောက်နဲ့ အမျိုးသမီး တစ်ယောက်ဆိုင်ကယ်စီးလာတာကို စစ်ကောင်စီတပ်တွေက သေနတ်နဲ့ ၅ ချက်လောက်ပစ်ခတ်လို့ အမျိုးသမီးတစ်ယောက် ထိခိုက်ဒဏ်ရာရကာ အမျိုးသားတစ်ယောက် ဖမ်းဆီးခံခဲ့ရတယ်လို့ ပြောပါ တယ်။

စစ်ကောင်စီတပ်တွေ ပစ်ခတ်လိုက်လို့ ဒဏ်ရာရရှိ သွားတဲ့ အမျိုးသမီးကတော့ ပေါင်ရင်းကို ကျည်ဆန်ထိမှန်ပြီး ပခုက္ကူပြည်သူ့ ဆေးရုံမှာ ဆေးကုသမှုခံယူနေရ ပါတယ်။

စစ်ကောင်စီတပ်တွေဟာ ပြည်သူတွေနဲ့ ကျောင်းသားလူငယ်တွေကို ရည်ရွယ်ချက်ရှိရှိ ဖမ်းဆီးသတ်ဖြတ်တာတွေ နေ့စဥ်ရက်ဆက် ကျူးလွန်နေကြတယ်လို့ နည်းပညာတက္ကသိုလ် ကျောင်းသားသမဂ္ဂရဲ့ ထုတ်ပြန်ချက်မှာ ဖော်ပြထားပါတယ်။

အခု ဖမ်းဆီးခံထားရတဲ့ ကျောင်းသား  ၄ ယောက်နဲ့ ပြည်သူတစ်ယောက်ကို စစ်ကောင်စီ တပ်တွေက ဘယ်ကို ခေါ်သွားတယ်ဆိုတာကိုတော့  အတည်ပြုလို့ မရသေးပါဘူး။