ရခိုင်ပြည်နယ်၊ မောင်တောခရိုင်က ဌာနဆိုင်ရာ ဝန်ထမ်းတွေဟာ အရင် အန်အယ်လ်ဒီအစိုးရလက်ထက် ပေးထားတဲ့  လစာ ၂ ဆကို အခု အာဏာသိမ်း စစ်ကောင်စီလက်ထက်မှာ ဆက်လက်ခံစားခွင့်မရရတော့မှာကို ဝန်ထမ်း အများစုက စိုးရိမ်နေကြပါတယ်။

မောင်တောမြို့မှာတာဝန်ကျတဲ့  နယ်ခြားစောင့်ဝန်ထမ်းတစ်ဦးက "ဟုတ်ပါတယ်။ အန်အယ်လ်ဒီ အစိုးရလက်ထက်က သတ်မှတ်ပေးခဲ့တဲ့ လစာ ၂ ဆပါ။ အခုစစ်ကောင်စီလက်ထက်မှာလစာ ၂ ဆမပေးတော့ဘဲ ရပ်တန့်လိုက်ရင် စားဝတ်နေရေး လုံးဝအဆင်ပြေကြမှာမဟုတ်တော့ဘူး။ ကုန်စျေးနှုန်းတွေက အဆမတန်တက်နေတာ။ ဒါကြောင့် မောင်တောခရိုင်က ဝန်ထမ်းတွေ စိုးရိမ်နေကြတာပါ။"လို့  ပြောပါတယ်။

ရခိုင်ပြည်နယ်အတွင်း ဖြစ်ပွားခဲ့တဲ့ ပဋိပက္ခတွေကြောင့် ဌာနဆိုင်ရာဝန်ထမ်းတွေကို  မူရင်းလစာရဲ့ ၂ ဆကို အထူးကိစ္စ တစ်ရပ်အနေနဲ့ ၃ လ ၁ ကြိမ် အမိန့်ကြော်ငြာစာတွေ ထုတ်ပြန်ကာ ခံစား ခွင့်ပြုထားခဲ့တာလည်း ဖြစ်ပါတယ်။ 

မောင်တောခရိုင်အထွေထွေအုပ်ချုပ်ရေးဦးစီးဌာနမှ ဝန်ထမ်းတစ်ဦးက "လက်ရှိအချိန် အထိတော့ မောင်တောခရိုင်က ဝန်ထမ်းတွေကို  ၂ လစာဆက်လက်ပေးမယ်၊ အမိန့်စာကို ပြည်နယ်အစိုးရက တရားဝင်ထုတ်ပြန်ထားတာမရှိသေးဘူး။ အခု မတ်လ အတွင်းမှာ ထုတ်ပြန်ပေးမှာပါ။"လို့ ပြောပါတယ်။

ရခိုင်ပြည်နယ်၊ မောင်တောခရိုင်အတွင်း  ဘူးသီးတောင်နဲ့ မောင်တောဒေသမှာ ၂၀၁၇ အောက်တိုဘာမှ ၂ဝ၂၁ ဒီဇင်ဘာလအထိပဋိပက္ခတွေဖြစ်ပွားခဲ့သလို ဒီနောက်ပိုင်းမှာလည်း ရခိုင်ပြည်နယ် ဒေသအတော်များများနဲ့  ချင်းပြည်နယ်၊ ပလက်ဝမြို့နယ်မှာလည်း တိုက်ပွဲတွေ ဖြစ်ပွားခဲ့ပါတယ်။