မကွေးတိုင်း၊ မြိုင်မြို့နယ်မှာ မတ်လ ၅ ရက်နဲ့ ၆ ရက်နေ့တွေမှာ စစ်ကောင်စီတပ်တွေကို မြိုင်PDF တပ်ဖွဲ့က ၃ ကြိမ်တိုက်ခိုက်ခဲ့ရာမှာ စစ်ကောင်စီဘက်က ၂ ယောက်ထက်မနည်းသေဆုံးကာ အများအပြားဒဏ်ရာရရှိသွားတယ်လို့ မြိုင်PDF ကနေ သိရပါတယ်။

မြိုင်မြို့အနောက်ဘက်က စစ်ကောင်စီစစ်ဆေးရေးဂိတ်ကို မနေ့ မွန်းလွဲ တစ်နာရီလောက်မှာ မြိုင်PDF ရဲ့ မြေခွေးပြောက်ကျားတပ်ဖွဲ့က ဝင်တိုက်ခဲ့လို့ စစ်ကောင်စီတပ်သား ၂ ယောက်လောက်သေဆုံးကာ အများအပြားဒဏ်ရာရသွားတယ်လို့ မြိုင်PDF ရဲ့ ပြန်ကြားရေးတာဝန်ခံက ပြောပါတယ်။

မြိုင်-ပခုက္ကူ လမ်းမှာရှိတဲ့ စီမံခန့်ခွဲရေးရုံးမှာ တပ်စွဲထားတဲ့ စစ်ကောင်စီတပ်သားတွေကို မနေ့ ညနေ ၃ နာရီလောက်မှာ မြိုင်PDF ရဲ့ ရွှေဓားဗိုလ်တပ်ဖွဲ့နဲ့ KG တပ်ဖွဲ့က လက်လုပ်လက်နက်ကြီးနဲ ပစ်ခတ်ရာ စစ်ကောင်စီဘက်က ထိခိုက်သေဆုံးသူရှိနိုင်တယ်လို့ ဆိုပါတယ်။

ကျားတက်-လင်းကတော လမ်းပေါ်မှာလည်း မတ်လ ၅ ရက်မနေ့က မွန်းလွဲ ၁ နာရီလောက်မှာ စစ်ကောင်စီကာ ၈ စီးကို မိုင်းအလုံး ၃၀ နဲ့ တိုက်ခိုက်ရာ စစ်ကား ၂ စီးပျက်စီးသွားပြီး ထိခိုက်သေဆုံးသူများပြားနိုင်တယ်လို့ ပြောပါတယ်။

စစ်ကောင်စီတပ်တွေကို တိုက်ခိုက်မှု ၃ ကြိမ်စလုံးမှာ မြိုင်PDF က ရဲဘော်တွေ အထိခိုက် အကျဆုံးမရှိခဲ့ဘူးလို့ ဆိုပါတယ်။

မြိုင်PDF တပ်ဖွဲ့ဟာ ဒေသကာကွယ်ရေး ညီနောင်မဟယမိတ်တပ်ဖွဲ့တွေနဲ့ ပူးပေါင်းပြီး ဖေဖော်ဝါရီ ၂၃ ရက်ကလည်း ပေါက်မြို့နယ်ရေပြာရဲစခန်းကို စီးနင်းတိုက်ခိုက်ခဲ့ရာ စခန်းမှူးအပါအဝင် ရဲ ၅ ယောက်သေဆုံးခဲ့တယ်လို့သိရပါတယ်။

နှစ်ဖက်တိုက်ပွဲတွေနဲ့ ပတ်သက်လို့တော့ ထိခိုက်သေဆုံးတဲ့ အခြေနေကိုတော့ စစ်ကောင်စီဘက်က သတင်းထုတ်ပြန်ထားတာမတွေ့ရသေးပါဘူး။