အမေရိကန်ရဲ့ ဗီဇာနဲ့ မာစတာ နိုင်ငံတကာကော်ပိုရေးရှင်းတွေက ရုရှားမှာ လုပ်ငန်းလည်ပတ်မှု ဆိုင်းငံ့လိုက်ပြီး ငွေထုတ်ငွေလွှဲ ကိစ္စရပ်တွေ ရပ်ဆိုင်းဖို့ ဖောက်သည်တွေနဲ့ မိတ်ဖက်တွေနဲ့အတူ ဆောင်ရွက်သွားမယ်လို့ မတ် ၅ ရက်မှာ ပြောပါတယ်။

ရက်ပိုင်းအတွင်း ရုရှားနိုင်ငံထဲမှာ ထုတ်ဝေထားတဲ့ ဗီဇာကတ်တွေရဲ့ ငွေထုတ်ငွေလွှဲလုပ်ငန်းတွေ ရုရှားနိုင်ငံအပြင်မှာ အလုပ်လုပ်တော့မှာ မဟုတ်သလို ရုရှားနိုင်ငံပြင်ပမှာ ထုတ်ထားတဲ့ ဘယ်ဗီဇာကတ်မဆို ရုရှားနိုင်ငံထဲမှာ အလုပ်လုပ်တော့မှာ မဟုတ်ဘူးလို့ ကုမ္ပဏီက ပြောပါတယ်။

ငွေထုတ်ငွေလွှဲလုပ်ငန်းကြီးတွေရဲ့ လုပ်ရပ်ဟာ စီးပွားရေးခက်ခဲပြီး​ ငွေကြေးဖောင်းပွနေတဲ့ မသေချာတဲ့ အနာဂတ်ကို ရင်ဆိုင်နေရတဲ့ ရုရှားပြည်သူတွေကို ပိုခက်ခဲစေတဲ့အပြင် သွင်းကုန်တွေ နဲ့ ပတ်သက်တဲ့ ကိစ္စရပ်တွေလည်း သိသိသာသာ အခက်တွေ့စေမှာပါ။

အနောက်နိုင်ငံတွေရဲ့ ဒဏ်ခတ်မှုကြောင့် ရုရှားဗဟိုဘဏ်ရဲ့ ပိုင်ဆိုင်မှု အမေရိကန်ဒေါ်လာ ၆၄၀ ဘီလီယံ ထုတ်မရဘဲ ရပ်ဆိုင်းနေပြီး ကမ္ဘာတလွှား ငွေပေးချေရေးစနစ်ကနေ ဘဏ်အတော်များများကို ဒဏ်ခတ်ထားလို့ ရုရှားငွေတန်ဖိုးဟာလည်း ဒီသီတင်းပတ် တပတ်အတွင်း သုံးပုံတပုံထိ တဟုန်ထိုး ကျဆင်းနေပါတယ်။