ပိုလန်နိုင်ငံက ယူကရိန်းလေတပ်ကို အင်အားဖြည့်ဖို့ ရုရှားလုပ် MiG-29 ဖိုက်တာဂျက်လေယာဉ်တွေ ဂျာမနီအခြေစိုက် အမေရိကန်စစ်စခန်းကို လွှဲပြောင်းပေးဖို့ ကမ်းလှမ်းပေမဲ့ အမေရိကန်အစိုးရက အံ့အားသင့်ဖွယ် ပယ်ချခဲ့ပါတယ်။
ပိုလန်နိုင်ငံခြားရေးဝန်ကြီးဌာနက MiG-29 ဂျက်တွေ ကူညီပေးဖို့ အသင့်ရှိနေပြီး တခြား နေတိုးအဖွဲ့ဝင် နိုင်ငံတွေကိုလည်း ယူကရိန်းလေကြောင်းကို ကာကွယ်ပေးဖို့ တိုက်တွန်းလိုက်တာပါ။
အမေရိကန် ထိပ်တန်းသံတမန် ဗစ်တိုရီးယား နူလန်က “ပိုလန်က အမေရိကန်နဲ့ ကြိုတင်ညှိနှိုင်းမှုမရှိဘဲ အမေရိကန်အခြေစိုက်စခန်းကို သူတို့တိုက်လေယာဉ်တွေ ပို့ဖို့လုပ်တာကို အံ့အားသင့်မိပါတယ်” လို့ ပြောပါတယ်။
အမေရိကန်က ယူကရိန်းကို လက်နက်တွေ အကူအညီပေးနေပေမဲ့ တိုက်လေယာဉ်တွေ ပေးဖို့ ငြင်းဆန်ပါတယ်။ နေတိုးအဖွဲ့ တိုက်လေယာဉ်တွေ ပေးရင် နိုင်ငံအားလုံးအတွက် အန္တရာယ်ပိုများလာမှာကို စိုးရိမ်နေတာပါ။
ရုရှားကလည်း ယူကရိန်းကို စစ်လေယာဉ်တွေပေးရင် အနောက်အုပ်စုအနေနဲ့ ရုရှားကို စစ်ကြေညာလိုက်တာပဲလို့ ပြောထားပါတယ်။