နည်းပြတူချယ်နှင့် ကစားသမားများအတွက် စိတ်မကောင်းဖြစ်ရကြောင်း ဂွါဒီယိုလာ ဖွင့်ဟ
အသင်းပိုင်ရှင်ကို ဗြိတိန်အစိုးရက အရေးယူပိတ်ဆို့ခဲ့တဲ့အပေါ် အသင်းနည်းပြတူချယ်နဲ့ ကစားသမားတွေအတွက် စိတ်မကောင်းဖြစ်ရတယ်လို့ မန်စီးတီးနည်းပြ ဂွါဒီယိုလာက ပြောပါတယ်။
ယူကရိန်းအား ရုရှားက ကျူးကျော်ခဲ့တဲ့အပေါ် ချဲလ်ဆီးအသင်းပိုင်ရှင်ဖြစ်သူ ရုရှားလူမျိုး အေဗရာမိုဗစ်ကို ဗြိတိန်အစိုးရက စီးပွားရေးအရပိတ်ဆို့အရေးယူခဲ့ပါတယ်။
ဒါကြောင့် ချဲလ်ဆီးအသင်းအနေနဲ့ အပြောင်းအရွှေ့ကိစ္စတွေကို လုပ်ဆောင်နိုင်တော့မှာ မဟုတ်သလို ပွဲနေ့တွေအတွက် လက်မှတ် ရောင်းချခွင့်လည်းရှိတော့မှာမဟုတ်ပါဘူး။
ဒီအခြေအနေဟာ ချဲလ်ဆီးအတွက် ခက်ခဲတဲ့ အချိန်ဖြစ်ပြီး နည်းပြတူချယ်နဲ့ ကစားသမားတွေအတွက် စိတ်မကောင်းဖြစ်ရတယ်လို့ ဂွါဒီယိုလာက ပြောပါတယ်။
“သတင်းခေါင်းစဉ်တွေဖတ်လိုက်ရပေမယ့် ဘာဖြစ်သလဲဆိုတာ သေချာမသိသေးပါဘူး။ ချဲလ်ဆီးအသင်း ဘာဖြစ်သွားသလဲဆိုတာ သေချာသိရဖို့ အချိန်နည်းနည်းပေးဖို့လိုပါတယ်။ ဒါပေမဲ့ သောမက်စ်တူချယ်နဲ့ ကစားသမားတွေအတွက်တော့ စိတ်ချမ်းမြေ့စရာ ကောင်းတဲ့အခြေအနေ မဟုတ်ပါဘူး။ ချဲလ်ဆီးအသင်းသားတွေဟာ ကိုယ့်အလုပ်ကို လုပ်နေရင်း ခုလိုဖြစ်ခဲ့တာမို့ သူတို့အတွက် စိတ်မကောင်းဖြစ်ရပါတယ်။”
ချဲလ်ဆီးအသင်းရဲ့ အခြေအနေအပေါ် စပါးနည်းပြ ကွန်တီကလည်း စာနာပေးခဲ့ပြီး အသင်း ဟောင်းကို ချစ်မြတ်နိုးနေဆဲဖြစ်ကာ အကောင်းဆုံးအခြေအနေတွေဖြစ်ဖို့ ဆန္ဒပြုကြောင်း ပြောပါတယ်။
