ပဲခူးတိုင်းဒေသကြီး၊ ကေအန်ယူ၊ တပ်မဟာ ၃  ညောင်လေးပင်ခရိုင်၊ ကျောက်ကြီးမြို့နယ်နဲ့ ဆောထိမြို့နယ်အတွင်းကို မတ် ၁၉ ရက် မနက် ၂ နာရီလောက်မှာ စစ်ကောင်စီက လေကြောင်းနဲ့ ဗုံး ၄ လုံး လာရောက်ကြဲတာကြောင့် ဒေသခံ ၃၇၀၀ လောက် တောတောင်တွေထဲ ထွက်ပြေးတိမ်းရှောင်နေရတယ်လို့ ကေအန်ယူက ဒီနေ့ သတင်းထုတ်ပြန်ပါတယ်။

ကျောက်ကြီးမြို့နယ်၊ ကွီးလားကျေးရွာအတွင်းကို ဗုံး ၂ လုံးနဲ့ ဆောထိမြို့နယ်၊ တကက်ပူကျေးရွာအတွင်းကို ဗုံး ၂ လုံးစီ လေကြောင်းကနေ ဗုံးကြဲချခဲ့တဲ့အတွက် အရပ်သားပြည်သူတွေ ထိခိုက်သေဆုံးမှုမရှိပေမယ့် လူနေအိမ်နဲ့ အဆောက်အဦတချို့ ထိမှန်ပျက်စီးခဲ့တယ်လို့ ဆိုပါတယ်။

စစ်ကောင်စီရဲ့ လေကြောင်းကနေ ဗုံးကြဲတိုက်ခိုက်တာကြောင့် တပ်မဟာ ၃ ထိန်းချုပ်နယ်မြေ၊ ညောင်လေးပင်ခရိုင်အတွင်းက ကျေးရွာပေါင်း  ၁၇  ရွာက အရပ်သားပြည်သူ ၃၇၀၀ နီးပါးဟာ စိုးရိမ်ကြောက်လန့်ပြီး ကျေးရွာကိုစွန့်ခွာကာ တောတောင်တွေထဲ ထွက်ပြေးတိမ်းရှောင်ခဲ့ရပါတယ်။

ဒေသခံပြည်သူတွေဟာ  စိုးရိမ်ကြောက်ရွံ့မှုတွေနဲ့  ကိုယ်လွတ်ရုန်း ထွက်ပြေးခဲ့ရတဲ့အတွက် စားဝတ်နေရေး အခက်အခဲအပြင် လုပ်ငန်းခွင်သွားလာရာမှာ ဘဝလုံခြုံမှုမရှိတဲ့အတွက် ရေရှည်မှာ မိသားစုအခက်အခဲတွေ ရှိလာနိုင်တယ်လို့ ဆိုပါတယ်။

လတ်တလော​ဖြစ်ပွားနေတဲ့ Covid - 19 (အိုမီခရွန်) ရောဂါတွေ့ရှိသူ များပြားလာတဲ့အတွက် ရောဂါကူးဆက်ခံရမှုမရှိအောင် ကာကွယ်ဖို့နဲ့ ပြန့်ပွားတာတွေမဖြစ်ရအောင် ထိန်းချုပ်ကုသရာမှာ များစွာအခက်အခဲဖြစ်စေတယ်လို့ ကရင်အမျိုးသားအစည်းအရုံး (ကေအန်ယူ) က ထုတ်ပြန်ပါတယ်။

ပြီးခဲ့တဲ့ ဖေဖော်ဝါရီလကလည်း တိုက်ပွဲတွေကြောင့် ကေအန်ယူ ထိန်းချုပ်နယ်မြေတွေဖြစ်တဲ့ ဒူးသထူခရိုင်၊ ညောင်လေးပင်ခရိုင်၊ မြိတ်/ထားဝယ်ခရိုင်၊ မူတြော်ခရိုင်နဲ့ ဒူးပလာယာခရိုင်တွေက အရပ်သားပြည်သူ ၇၀၀၀၀ ကျော် ကျေးရွာတွေကို စွန့်ခွာထွက်ပြေးတိမ်းရှောင်နေရပါတယ်။