ဘင်္ဂလားပင်လယ်အော်ထဲမှာ ဖြစ်နေတဲ့ လေဖိအားနည်းရပ်ဝန်းက မုန်တိုင်းဖြစ်လာပြီး မနက်ဖြန်ညပိုင်းမှာ ဧရာဝတီတိုင်းကို ဝင်ရောက်နိုင်တယ်လို့ မိုးလေဝသခန့်မှန်းသူတွေနဲ့ ခန့်မှန်းရေးဌာနတွေက ဆိုပါတယ်။

မိုးလေဝသပညာရှင်တယောက်ဖြစ်တဲ့ မစုစုစံက အခုဖြစ်လာမယ့်မုန်တိုင်းဟာ မတ် ၂၁ ရက်ကနေ ၂၃ အတွင်း ဧရာဝတီတိုင်းအနောက်ပိုင်းနဲ့ ရခိုင်ပြည်နယ်တောင်ပိုင်းကို ဝင်ရောက်တိုက်ခတ်မယ်လို့ ပြောပါတယ်။

ဒီရက်အတွင်း ရန်ကုန်၊ တနင်္သာရီ၊ ပဲခူး၊ မကွေး၊ နေပြည်တော်နဲ့ မန္တလေးတိုင်း၊ ရခိုင်၊ မွန်၊ ကရင်နဲ့ ရှမ်းပြည်နယ်တို့မှာ မိုးရွာနိုင်တယ်လို့လည်း ခန့်မှန်း ပြောဆိုထားပါတယ်။

မတ် ၂၁ ရက် ညနဲ့ ၂၂ ရက် မနက်ပိုင်းတို့မှာ မုန်တိုင်းဟာ ဧရာဝတီတိုင်းအနောက်ပိုင်း မော်တင်၊ ဟိုင်းကြီးကျွန်း၊ လပွတ္တာ၊ ငပုတော၊ ပုသိမ်၊ ချောင်းသာ၊ ငွေဆောင်၊ ငရုတ်ကောင်တို့ကို ဝင်ရောက်တိုက်ခတ်နိုင်ပြီး ၁ နာရီလေတိုက်နှုန်း ၅၅ မိုင်ကနေ မိုင် ၆၀ လောက်အထိ ပြင်းနိုင်တယ်လို့ ဆိုပါတယ်။

မိုးလေဝသဂြိုဟ်တုတွေကနေ ရယူထားတဲ့အချက်အလက်တွေဖြစ်လို့ ခန့်မှန်းချက်တွေဟာ မလွဲနိုင်ဘူးလို့လည်း သူက ဆိုပါတယ်။

မတ် ၂၂ ရက် ညနဲ့ ၂၃ ရက်တို့မှာတော့ အမ်းတောင်ကြားလမ်း၊ မကွေး၊ မင်ဘူး ပဒါန်းလမ်း၊ အမ်းတောင်ကုန် သံတွဲလမ်းပိုင်းတို့မှာ ရာသီဥတု ဆိုးရွားနိုင်တယ်လို့လည်း ဆိုပါတယ်။

မုန်တိုင်းမိုးတွေကြောင့် ရခိုင်ရိုးမပေါ်မှာ မိုးကြီးနိုင်တာကြောင့် အရှေ့ဘက်မှာရှိတဲ့ မြို့ရွာတွေမှာ တောင်ကျရေ ဆင်းနိုင်တာကိုလည်း သတိပြုဖို့ သူက တိုက်တွန်းထားပါတယ်။

နိုင်ငံတကာသတင်းတချို့မှာတော့ အခုမုန်တိုင်းကို ဆိုင်ကလုန်းမုန်တိုင်း အာဆာနီအဖြစ် ဖော်ပြနေကြပြီး ကြိုတင်ပြင်ဆင်တာတွေလုပ်ကြဖို့ သတိပေးထားကြပါတယ်။

စစ်ကောင်စီလက်အောက်ခံ မိုးလေဝသနဲ့ ဇလဗေဒညွှန်ကြားမှု ဦးစီးဌာနကလည်း မုန်တိုင်းသတင်းကို ထုတ်ပြန်ထားပြီး လက်ရှိမှာ မုန်တိုင်းငယ်ဖြစ်နေပြီလို့ ကြေညာထားပါတယ်။ 

မတ် ၂၁ ရက် မနက်ပိုင်းမှာ ကိုကိုးကျွန်းအနီး၊ ညပိုင်းမှာ‌တော့ ဧရာဝတီတိုင်း ဟိုင်းကြီးကျွန်းနား၊ မတ် ၂၂ ရက် မနက်ပိုင်းမှာ ရခိုင်ကမ်းရိုးတန်းကို ရောက်မယ်လို့ ခန့်မှန်း ထုတ်ပြန်ထားပါတယ်။ မြန်မာနိုင်ငံကိုဝင်ရောက်နိုင်တာကြောင့် လိမ္မော်ရောင်အဆင့်အဖြစ် သတ်မှတ်ထားပြီး နောက် ၂၄ နာရီအတွင်း အားကောင်းတဲ့ ဆိုင်ကလုန်းမုန်တိုင်းငယ်ဖြစ်လာနိုင်တယ်လို့ ဆိုပါတယ်။

ဒီနေ့ညနေအထိ ခန့်မှန်းချက်အနေနဲ့ တနင်္သာရီတိုင်း၊ မွန်ပြည်နယ်၊ ကရင်ပြည်နယ်၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ ကချင်ပြည်နည်တို့မှာ မိုးရွာနိုင်တယ်လို့လည်း ဆိုပါတယ်။ နောက် ၂ ရက်အတွင်းမှာတော့ တနိုင်ငံလုံးမှာ မိုးရွာနိုင်တယ်လို့ ဆိုပါတယ်။

နိုင်ငံတကာ မိုးလေဝသခန့်မှန်းရေး ဝက်ဘ်ဆိုက်တခုဖြစ်တဲ့ windy.com ကလည်း မုန်တိုင်းဟာ ဧရာဝတီတိုင်းအနောက်တောင်ပိုင်းကို ဖြတ်ကျော်ဝင်ပြီးနောက် ဘင်္ဂလားပင်လယ်အော်ထဲကို ပြန်ထွက်ပြီး ရခိုင်ပြည်နယ်တောင်ပိုင်းက ဝင်ရောက်နိုင်တယ်လို့ ခန့်မှန်းဖော်ပြထားပါတယ်။