အမေရိကန် နိုင်ငံခြားရေးဝန်ကြီးဟောင်း မက်ဒလင်း အောဘရိုက် ကွယ်လွန်

အမေရိကန် နိုင်ငံခြားရေးဝန်ကြီးဟောင်း ဒေါက်တာ မက်ဒလင်း အောဘရိုက် (အသက် ၈၄ နှစ်) ဟာ မတ် ၂၃ ရက်က ကွယ်လွန်သွားပါတယ်။
မက်ဒလင်း အောဘရိုက်ဟာ အမေရိကန်ရဲ့ ၆၄ ဦးမြောက် အမေရိကန်ပြည်ထောင်စု နိုင်ငံခြားရေးဝန်ကြီးဖြစ်ပြီး အဲဒီရာထူးကို ထမ်းဆောင်တဲ့ ပထမဆုံးအမျိုးသမီးပါ။
သူဟာ ကုလသမဂ္ဂဆိုင်ရာ အမေရိကန် သံအမတ်ကြီးအဖြစ် ၁၉၉၃ ကနေ ၁၉၉၇ အထိ ထမ်းဆောင်ခဲ့ပြီး သမ္မတ ကလင်တန်လက်ထက် နိုင်ငံခြားရေးဝန်ကြီးတာဝန်ကို ၁၉၉၇ ကနေ ၂၀၀၁ အထိ ထမ်းဆောင်ခဲ့ပါတယ်။
အာဏာရှင်အစိုးရတွေနဲ့ ဆက်ဆံရာမှာ ခပ်မာမာတင်းတင်း ပြောဆိုတတ်တဲ့ သံတမန်တဦးအဖြစ် ကျော်ကြားပါတယ်။ ၁၉၉၀ ပြည့်နှစ်တွေမှာ ရဝမ်ဒါနဲ့ ဘော့စနီးယား ဟာဇီဂိုဗီးနား လူမျိုးတုံးသတ်ဖြတ်မှု ပဋိပက္ခတွေကို အမေရိကန်အစိုးရ ဝင်ရောက်ဖြေရှင်းဖို့ တွန့်ဆုတ်နေချိန်မှာ အစိုးရအဖွဲ့အတွင်း ပြတ်ပြတ်သားသား လုပ်ကိုင်ဖို့ ပြောဆိုခဲ့သူပါ။
အောဘရိုက်ကို ၁၉၃၇ ခုနှစ်က ချက်ကိုဆလိုဗက်ကီးယားနိုင်ငံ ပရက်ဂ်မြို့မှာ မွေးဖွားခဲ့ပြီး နိုင်ငံကို ဂျာမနီတို့ သိမ်းပိုက်မှုကြောင့် ဖခင် သံအမတ်နဲ့အတူ လန်ဒန်မြို့ကို ရှောင်တိမ်းခဲ့ပါတယ်။ ဆွစ်ဇာလန်မှာ အသက် ၁၀ နှစ်အထိ ကျောင်းနေခဲ့ပါတယ်။ ဒုတိယကမ္ဘာစစ်ပြီးနောက် ချက်ကိုဆလိုဗက်ကီးယားကို ပြန်ခဲ့ပေမယ့် နိုင်ငံရေး မတည်ငြိမ်မှုကြောင့် မိဘတွေနဲ့အတူ အမေရိကန်ပြည်ထောင်စုကို ပြောင်းရွှေ့ခိုလှုံခဲ့ပါတယ်။
အောဘရိုက်က မက်ဆာချူးဆက်ပြည်နယ် ဝဲလ်ဆလီကောလိပ်ကို တက်ရောက်ခဲ့ပြီး ကိုလံဘီယာတက္ကသိုလ်မှ ဒေါက်တာဘွဲ့ ရခဲ့ပါတယ်။
ချက်၊ ပြင်သစ်၊ ပိုလန်၊ ရုရှား၊ အင်္ဂလိပ် အပါအဝင် ဘာသာစကား ၆ မျိုးကို ကျင်လည်စွာ စကားပြောနိုင်သူပါ။
၁၉၉၅ မှာ မြန်မာနိုင်ငံကို လာရောက်ခဲ့ပြီး ဒေါ်အောင်ဆန်းစုကြည်နဲ့ တွေ့ဆုံခဲ့ပါတယ်။ အတွင်းရေးမှူး ၁ ဗိုလ်ချုပ်ကြီးခင်ညွန့်နဲ့ တွေ့ဆုံပြီး ‘ရှင်တို့ အာဏာရှင်တွေဟာ အမြဲ ဒီလိုပဲ လိမ်ညာနေတာပဲ’ လို့ ခပ်မာမာထန်ထန် ပြောခဲ့ပါတယ်။
မက်ဒလင်း အောဘရိုက်ဟာ အမေရိကန်ပြည်ထောင်စု အမျိုးသမီးများအတွက် စံပြအတုယူ အားကျရတဲ့ အိုက်ကွန်တဦးဖြစ်ပါတယ်။
“တဦးကိုတဦး မကူညီတဲ့ အမျိုးသမီးတွေအတွက် ငရဲမှာ အထူးနေရာရှိတယ်” ဆိုတဲ့ သူ့ရဲ့ အမျိုးသမီးတွေကို တိုက်တွန်းတဲ့စကားက ကျော်ကြားပါတယ်။
စစ်ပြေးဒုက္ခသည်နဲ့ သံတမန်ဘဝ အတွေ့အကြုံ စာအုပ်ပေါင်းများစွာကို နောက်ဆုံးအချိန်အထိ ရေးသားခဲ့ပါတယ်။